ଗାଧୋଇବାକୁ ଯାଇ ଭାସିଗଲେ ନାବାଳକ, ଦୁଇ ଦିନ ହେଲାଣି ମିଳୁନି ପତ୍ତା

ନାଗାବଳୀ ନଦୀରେ ଗାଧୋଇବାକୁ ଯାଇ ନିଖୋଜ ହୋଇଯାଇଛନ୍ତି ଜଣେ ୧୪ ବର୍ଷୀୟ ନାବାଳକ। ରାୟଗଡ଼ାର ହାତିପଥର ନିକଟରେ ଘଟିଛି ଏହି ଅଘଟଣ।
ନିଖୋଜ ନାବାଳକ ଜଣକ ହେଉଛନ୍ତି ପ୍ରଭାତ କୁମାର ପାଣି। ତାଙ୍କ ପିତାଙ୍କ ନାମ ବିଷ୍ଣୁ ପ୍ରସାଦ ପାଣି।
ଗତ ନଭେମ୍ବର ୧ ତାରିଖ ମଧ୍ୟାହ୍ନରେ ନଦୀରେ ଗାଧୋଉଥିବା ବେଳେ ପାଣିର ପ୍ରଖର ସ୍ରୋତରେ ସେ ଭାସିଯାଇଥିବା ଜଣାପଡ଼ିଛି। ଘଟଣା ପରେ ଖବର ପାଇ ଅଗ୍ନିଶମ ବାହିନୀ ଓ ଉଦ୍ଧାରକାରୀ ଦଳ ଘଟଣାସ୍ଥଳରେ ପହଞ୍ଚି ନାବାଳକଙ୍କୁ ଖୋଜିବା ପାଇଁ ଜୋରଦାର ସନ୍ଧାନ ଅଭିଯାନ ଆରମ୍ଭ କରିଥିଲେ। ତେବେ ଘଟଣାକୁ ଦୁଇ ଦିନରୁ ଅଧିକ ସମୟ ବିତିଯାଇଥିଲେ ମଧ୍ୟ ଏଯାଏ ତାଙ୍କର ପତ୍ତା ମିଳିପାରିନାହିଁ।
ପ୍ରଶାସନ ଓ ସ୍ଥାନୀୟ ଲୋକଙ୍କ ସହଯୋଗରେ ନାଗାବଳୀ ନଦୀରେ ଉଦ୍ଧାର ଅଭିଯାନ ଜାରି ରହିଛି। ଅନ୍ୟପଟେ, ଏହି ଘଟଣାକୁ ନେଇ କୌଣସି ଅଧିକାରୀ କିମ୍ବା ପରିବାର ପକ୍ଷରୁ ପ୍ରତିକ୍ରିୟା ମିଳିପାରିନାହିଁ।