୪ ଜଣ ଆତଙ୍କବାଦୀଙ୍କୁ ଖୋଜୁଛି କଶ୍ମୀର ପୋଲିସ, ଜାରି ହେଲା ପୋଷ୍ଟର୍

ଜମ୍ମୁ କାଶ୍ମୀର ପୋଲିସ ସୀମାରେ ସକ୍ରିୟ ଥିବା କିଛି ଆତଙ୍କବାଦୀଙ୍କୁ ଧରିବାକୁ ଜୋରଦାର ପ୍ରୟାସ ଆରମ୍ଭ କରିଦେଇଛି । ପୋଲିସ ଶ୍ରୀନଗରର ଗୁରୁତ୍ୱପୂର୍ଣ୍ଣ ଅଞ୍ଚଳରେ ଲସ୍କର-ଏ-ତୋଏବା ସଦସ୍ୟ ମହମ୍ମଦ ଲତୀଫ ଭଟ ସମେତ ମୋଟ ୪ ଜଣ ଆତଙ୍କୀଙ୍କ ଫଟୋ ଜାରି କରିଛି । ମହମ୍ମଦ ଲତୀଫ ଭଟ , ବିଲାଲ ଅହମଦ ମୀର, ମୋହମ୍ମଦ ଉମର ମୀର ଏବଂ ଆବିଦ କୟୁମ ଲୋନର ଫଟୋ ଜାରି କରାଯାଇଛି । ଲାଲ ଚୌକ ଏବଂ ପ୍ରତାପ ପାର୍କ ନିକଟରେ ଆତଙ୍କୀଙ୍କ ପୋଷ୍ଟର୍ ଲଗାଯାଇଛି । ଯେଉଁମାନେ ଏମାନଙ୍କ ସମ୍ପର୍କରେ ଖବର ଦେବେ ସେମାନଙ୍କୁ ୧୫ ଲକ୍ଷ ଟଙ୍କାର ପୁରସ୍କାର ପ୍ରଦାନ କରାଯିବ ବୋଲି ଉଲ୍ଲେଖ କରାଯାଇଛି ।
ଏହି ତଲାସୀ ଅଭିଯାନରେ ମୁଖ୍ୟ ଆସାମୀ ହେଉଛି ଦକ୍ଷିଣ କଶ୍ମୀରର କୁଲଗାମ ଜିଲ୍ଲାର ବାସିନ୍ଦା ମହମ୍ମଦ ଲତୀଫ ଭଟ ଓରଫ୍ ଅବଦୁଲ ଲତୀଫ ଭଟ । ଲତୀଫ ଜଣେ କଟ୍ଟର ଆତଙ୍କବାଦୀ । ଗତ ଜୁଲାଇରେ ଅନନ୍ତନାଗ ଜିଲ୍ଲାରେ ଜଣେ ପୋଲିସ ଅଧିକାରୀଙ୍କ ହତ୍ୟା ଏବଂ ଅନ୍ୟ କର୍ମଚାରୀଙ୍କୁ ଟାର୍ଗେଟ୍ କରିବା ଭଳି ଅଭିଯୋଗ ରହିଛି । ସେହିପରି ଅନ୍ୟ ତିନି ଜଣ ବିଲାଲ ଅହମଦ ମୀର, ମୋହମ୍ମଦ ଉମର ମୀର ଏବଂ ଆବିଦ କୟୁମ ଲୋନର ବଲମୁଲା ଜିଲ୍ଲାର ବାସିନ୍ଦା ଅଟନ୍ତି । ଏମାନେ ପାକ୍ ଅଧିକୃତ କଶ୍ମୀରରେ ଆତଙ୍କବାଦୀ କାର୍ଯ୍ୟକଳାପରେ ସଂଶ୍ଳିଷ୍ଟ ଅଛନ୍ତି । ପୋଲିସ ଜନତାଙ୍କୁ ଆହ୍ୱାନ କରିଛି ଯେ ଉପରୋକ୍ତ ୪ ଜଣ ଆତଙ୍କବାଦୀଙ୍କୁ ଧରାଇ ଦେଲେ ଆକର୍ଷଣୀୟ ପୁରସ୍କାର ରାଶି ପ୍ରଦାନ କରାଯିବା ସହିତ ସେମାନଙ୍କ ପରିଚୟକୁ ଗୋପନୀୟ ରଖାଯିବ ।
ଏହି ପଦକ୍ଷେପ କଶ୍ମୀର ଉପତ୍ୟକାରୁ ଆତଙ୍କବାଦୀଙ୍କ ଶେଷ ଚିହ୍ନକୁ ପୋଛି ଦେବା ପାଇଁ ଏକ ନୂତନ ଏବଂ ସମନ୍ୱିତ ପ୍ରୟାସର ଏକ ଅଂଶ ବୋଲି ପୋଲିସ କହିଛି । ପୋଲିସ ଏବଂ ସୁରକ୍ଷା ବାହିନୀ ଯେକୌଣସି ଅବଶିଷ୍ଟ ଆତଙ୍କବାଦୀ ନେଟୱାର୍କକୁ ସମ୍ପୂର୍ଣ୍ଣ ଭାବରେ ସମାପ୍ତ କରିବାକୁ ଚାହାଁନ୍ତି ଯାହା ଦ୍ଵାରା ଉପତ୍ୟକା ଆତଙ୍କବାଦର ଛାୟାରୁ ମୁକ୍ତ ହୋଇପାରିବ।