રાંધેજા ગામમાં આસો સુદ ચૌદસે ગરબાની રમઝટ

ગાંધીનગર જિલ્લાના રાંધેજા ગામમાં આસો સુદ ચૌદસના પાવન અવસરે દીવાની પાર્ટી મુંદાજીના માઢ ખાતે ગરબા કાર્યક્રમનું આયોજન કરવામાં આવ્યું હતું.

લોકગાયિકા હિના સુથાર અને લોકગાયક દેવરાજ બારોટ સહિત મ્યુઝિક આર્ટિસ્ટોએ પોતાની સંગીતમય પ્રસ્તુતિથી માહોલને ભક્તિમય અને ઉત્સાહસભર બનાવી દીધો હતો.

હિના સુથારે પોતાના મધુર સ્વરમાં માતાજીના ગરબા રજૂ કરીને ઉપસ્થિત ખેલૈયાઓને ગરબે ઘૂમવા મજબૂર કર્યા હતા, સંગીતના તાલે ખેલૈયાઓએ ઉત્સાહપૂર્વક ગરબા રમીને નવરાત્રીના રંગમાં રંગાઈને કાર્યક્રમને યાદગાર બનાવ્યો હતો.

આમ, રાંધેજા ગામમાં આસો સુદ ચૌદસના ગરબા કાર્યક્રમમાં ભક્તિ, સંગીત અને લોકસંસ્કૃતિનો સુંદર સમન્વય જોવા મળ્યો હતો.