અમદાવાદ: નકલી દારૂની મિની ફેક્ટરી ઝડપાઈ, મોંઘી બ્રાન્ડની બોટલોમાં સસ્તો દારૂ ભરી વેચાતો હતો

અમદાવાદના ઠક્કરબાપાનગર, કૃષ્ણનગર વિસ્તારમાં ઝોન-5 LCB અને કૃષ્ણનગર પોલીસે સંયુક્ત રીતે દરોડો પાડી નકલી દારૂના રેકેટનો પર્દાફાશ કર્યો છે. પોલીસના જણાવ્યા મુજબ, આ રેકેટમાં સસ્તા દારૂને મોંઘી વિદેશી બ્રાન્ડની ખાલી બોટલોમાં ભરી, તેના પર ડુપ્લિકેટ લેબલ અને ઢાંકણાં લગાવી ઊંચા ભાવે વેચવામાં આવતો હતો.

પોલીસે દરોડા દરમિયાન કુલ ₹1.32 લાખથી વધુનો મુદ્દામાલ કબજે કર્યો છે. જેમાં નકલી દારૂ ભરેલી બોટલો, મોટી સંખ્યામાં ખાલી કાચની બોટલો, પ્લાસ્ટિક ક્વાર્ટર, ઢાંકણાં અને નકલી બ્રાન્ડ સ્ટીકરોનો સમાવેશ થાય છે. આ ઉપરાંત, દરોડામાં 322 ખાલી કાચની બોટલો, 118 પ્લાસ્ટિક ક્વાર્ટર અને 293 ઢાંકણાં મળી આવ્યા હતા.

આ કેસમાં પોલીસે હેમલ ઉર્ફે હેમુ વાઘેલા નામના આરોપીની ધરપકડ કરી છે. જોકે, પોલીસ તપાસમાં અન્ય આરોપીઓના નામ પણ સામે આવે તેવી શક્યતા છે અને તેમની શોધખોળ ચાલી રહી છે. આ નકલી દારૂ અમદાવાદમાં ક્યાં-ક્યાં સુધી પહોંચતો હતો તે દિશામાં પણ પોલીસ ઊંડાણપૂર્વક તપાસ કરી રહી છે.