માછીમાર ડેલીગેશને મંત્રીઓને વિવિધ પ્રશ્નો અંગે રજૂઆત કરી

અખિલ ગુજરાત માછીમાર મહામંડળના પ્રમુખ શ્રી કિશોરભાઈ મોહનભાઈ કુહાડાની અધ્યક્ષતા હેઠળ એક માછીમાર ડેલીગેશને ગુજરાત રાજ્યના મત્સ્યોદ્યોગ મંત્રી શ્રી જીતુભાઈ વાઘાણી સાહેબ તથા પર્યાવરણ મંત્રી શ્રી અર્જુનભાઈ મોઢવાડીયા સમક્ષ વિવિધ પ્રશ્નો અંગે વિસ્તૃત રજૂઆત કરી હતી.

આ ડેલીગેશનમાં અખિલ ગુજરાત માછીમાર મહામંડળના પ્રમુખ શ્રી કિશોરભાઈ મોહનભાઈ કુહાડા, સુત્રાપાડા ખારવા સમાજના બાલુભાઈ દરી, સુત્રાપાડા કોળી સમાજના નથુભાઈ જીવાભાઈ, ભીડિયા કોળી સમાજના પ્રતિનિધિ તરીકે વસંતભાઈ વૈશ્ય, ધામરેજ સમસ્ત ખારવા સમાજના બંસીભાઈ હરેશભાઈ, મુળ દ્વારકા ખારવા સમાજના સુગનેશભાઈ ડાલકી, અખિલ ગુજરાત માછીમાર મહામંડળના મંત્રી શ્રી પૃથ્વીભાઈ ફોફંડી સહિત અનેક માછીમાર આગેવાનો ઉપસ્થિત રહ્યા હતા.

આ મુલાકાત દરમિયાન, માછીમાર સમુદાય દ્વારા સામનો કરવામાં આવતી વિવિધ સમસ્યાઓ અને પડકારો અંગે મંત્રીઓને માહિતગાર કરવામાં આવ્યા હતા. ડેલીગેશને માછીમારી ઉદ્યોગને લગતા નીતિ-નિયમો, પર્યાવરણીય સંરક્ષણ અને માછીમારોના આર્થિક ઉત્કર્ષ જેવા મુદ્દાઓ પર ચર્ચા કરી હતી. મંત્રીઓએ ડેલીગેશનના પ્રશ્નો ધ્યાનપૂર્વક સાંભળ્યા હતા અને શક્ય તેટલી ઝડપી કાર્યવાહીની ખાતરી આપી હતી.