સુરત નવી સિવિલ હોસ્પિટલમાં માથાભારે શખ્સનો આતંક: મહિલા કર્મચારીઓની છેડતી અને ધમકીઓ

સુરતની નવી સિવિલ હોસ્પિટલના સ્ટેમસેલ બિલ્ડિંગમાં છેલ્લા કેટલાક સમયથી એક માથાભારે શખ્સ દ્વારા મચાવવામાં આવી રહેલા આતંકને લઈને હોસ્પિટલ પ્રશાસને લાલ આંખ કરી છે. મહિલા કર્મચારીઓની છેડતી, સ્ટાફને ધમકીઓ આપવા, સિક્યુરિટી સાથે મારામારી કરવા તેમજ સરકારી કામગીરીમાં અવરોધ ઊભો કરવા બદલ નવી સિવિલ હોસ્પિટલના રેસિડેન્ટ મેડિકલ ઓફિસર દ્વારા ખટોદરા પોલીસને પત્ર લખી કડક કાયદેસરની કાર્યવાહી કરવાની માંગ કરવામાં આવી છે.

ખટોદરા પોલીસને મોકલેલા પત્રમાં જણાવ્યા મુજબ, સ્ટેમસેલ બિલ્ડિંગના ચોથા માળે આવેલા પ્લાસ્ટિક સર્જરી વોર્ડમાં આ શખ્સ બિન્દાસપણે ઘૂસી જઈને આતંક મચાવે છે. તે વોર્ડમાં ફરજ બજાવતી મહિલા નર્સિંગ સ્ટાફ અને અન્ય મહિલા કર્મચારીઓ સામે બેસીને અભદ્ર વર્તન કરતો હતો.

એટલું જ નહીં, રાત્રિ દરમિયાન મહિલા કર્મચારીઓના રૂમમાં ઘૂસી જવાનો પ્રયાસ કરીને ગંભીર છેડતી પણ કરી હતી. આ વિકૃત હરકતોના કારણે હોસ્પિટલનો મહિલા સ્ટાફ અત્યંત ભયના ઓથાર હેઠળ ફરજ બજાવવા મજબૂર બન્યો છે. આ મામલે તાત્કાલિક ધોરણે પગલાં લેવા માટે પોલીસ સમક્ષ રજૂઆત કરવામાં આવી છે.