ધારીના બે વિદ્યાર્થીઓએ અમદાવાદમાં ચૂંટણી અધિકારીઓ સાથે કરી કોન્ફરન્સ

ભારતીય ચૂંટણી પંચ દ્વારા મતદાર જાગૃતિ ફેલાવવાના ઉમદા હેતુથી શરૂ કરાયેલ 'ઇલેક્ટોરલ લીટરસી ક્લબ' અંતર્ગત ધારી તાલુકાનું પ્રતિનિધિત્વ કરતા શ્રી જી. એન. દામાણી મ્યુનિસિપલ હાઇસ્કુલના બે વિદ્યાર્થીઓએ અમદાવાદ ખાતે એક વિશેષ કોન્ફરન્સમાં ભાગ લીધો હતો. આ કોન્ફરન્સમાં મુખ્ય ચૂંટણી કમિશ્નર શ્રી ગ્યાનેશ કુમાર, ગુજરાત રાજ્યના મુખ્ય ચૂંટણી કમિશ્નર અને તેમની ટીમ ઉપસ્થિત રહી હતી.

'ઇલેક્ટોરલ લીટરસી ક્લબ' એ શાળા, કોલેજો અને ગ્રામીણ સ્તરે મતદારોમાં જાગૃતિ લાવવા માટે ભારતીય ચૂંટણી પંચની એક મહત્વપૂર્ણ પહેલ છે. આ ક્લબનો મુખ્ય ઉદ્દેશ્ય વિદ્યાર્થીઓ અને યુવાનોને ચૂંટણી પ્રક્રિયા, મતદાનના અધિકાર અને લોકશાહીના મૂલ્યો વિશે રસપ્રદ અને વ્યવહારુ જ્ઞાન આપવાનો છે.

આ પ્રસંગે, શાળા વતી પ્રતિનિધિત્વ કરનાર વિદ્યાર્થીઓ ગોહિલ કરણસિંહ અને વૈદેહી બાંભણીયાને નગરપાલિકા ધારીના પ્રમુખ શ્રી જયદીપભાઈ બસિયા અને તેમની ટીમ દ્વારા શુભેચ્છાઓ પાઠવવામાં આવી હતી. શાળાના આચાર્ય શ્રી એમ.બી. બારડે પણ વિદ્યાર્થીઓની આ સિદ્ધિ બદલ અભિનંદન પાઠવ્યા હતા.