સુરત: ગોદાવાડીમાં નિધિ પટેલની હત્યાના એક મહિના બાદ પણ આરોપીઓ ફરાર, રેન્જ આઈજી પ્રેમવીરસિંહે તપાસની કમાન સંભાળી

સુરત જિલ્લાના માંડવી તાલુકાના ગોદાવાડી ગામે એક મહિના અગાઉ લૂંટના ઈરાદે ઘરમાં ઘૂસેલા લૂંટારુઓએ ૨૫ વર્ષીય યુવતી નિધિ પટેલની હત્યા કરી હતી. આ ચકચારી લૂંટ વિથ હત્યાની ઘટનાને એક મહિનો વીતી ગયો હોવા છતાં આરોપીઓ હજુ સુધી પોલીસ પકડથી દૂર છે. જેને પગલે હવે સુરત રેન્જ આઈજી પ્રેમવીરસિંહે આ મામલે તપાસમાં સીધી દેખરેખ શરૂ કરી છે.

આ ઘટનાની ગંભીરતાને ધ્યાનમાં રાખીને જિલ્લા પોલીસ દ્વારા ખાસ તપાસ ટીમ એટલે કે એસઆઈટી (SIT)ની રચના કરવામાં આવી હતી. આ SIT દ્વારા અત્યાર સુધીમાં અનેક શકમંદોની સઘન પૂછપરછ કરવામાં આવી છે.

તપાસ દરમિયાન પોલીસ દ્વારા કેટલાક શકમંદોના નાર્કો ટેસ્ટ અને ડીએનએ (DNA) ટેસ્ટ પણ કરવામાં આવ્યા હોવાની માહિતી સામે આવી છે. પોલીસ આ મામલે ગુનેગારો સુધી પહોંચવા માટે તમામ દિશામાં તપાસ ચલાવી રહી છે.