થરાદ અને દિયોદરમાં દારૂના ગુનાઓમાં પાંચ મહિનાથી નાસતો ફરતો આરોપી જેતડાથી ઝડપાયો

વાવ-થરાદ જિલ્લા પોલીસ દ્વારા નાસતા ફરતા આરોપીઓને ઝડપી પાડવા માટે ચલાવવામાં આવી રહેલી ખાસ ઝુંબેશ અંતર્ગત લોકલ ક્રાઈમ બ્રાન્ચ (LCB)ને મોટી સફળતા મળી છે. થરાદ અને દિયોદર પોલીસ સ્ટેશન વિસ્તારમાં નોંધાયેલા દારૂના બે અલગ-અલગ ગુનાઓમાં છેલ્લા પાંચેક મહિનાથી પોલીસને થાપ આપી નાસતા ફરતા એક આરોપીને એલસીબીએ ઝડપી પાડ્યો છે.

પોલીસ પાસેથી મળતી માહિતી અનુસાર, ઝડપાયેલા આરોપીની ઓળખ ભરતભાઈ કરશનભાઈ રાજપુત (ઉંમર ૩૨ વર્ષ, રહેવાસી- જેતડા, તાલુકો- થરાદ) તરીકે થઈ છે. આરોપીને પકડવા માટે એલસીબીની ટીમે હ્યુમન સોર્સ અને ટેક્નિકલ સર્વેલન્સની મદદ લીધી હતી, જેના આધારે તેની ચોક્કસ ભાળ મેળવીને તેને દબોચી લેવામાં આવ્યો હતો.

પોલીસના જણાવ્યા અનુસાર, પકડાયેલા આરોપી ભરતભાઈ રાજપુત વિરુદ્ધ અગાઉ પ્રોહિબિશન એક્ટ હેઠળ બે ગુનાઓ નોંધાયેલા છે, જેમાં તે છેલ્લા પાંચ મહિનાથી ફરાર હતો. હાલમાં આરોપીને રાઉન્ડઅપ કરી લેવામાં આવ્યો છે અને તેની સામે આગળની કાયદેસરની કાર્યવાહી હાથ ધરવા માટે તેને થરાદ પોલીસ સ્ટેશનને સોંપવામાં આવ્યો છે.