અમદાવાદ શહેરમાં પોલીસની અપીલ બાદ ૪૭૭ હથિયારો જમા થયા

અમદાવાદ શહેરમાં શાંતિ અને સલામતીનું વાતાવરણ વધુ દ્રઢ બનાવવાના ઉમદા હેતુ સાથે શહેર પોલીસ સેક્ટર-૧ (ઝોન ૧, ૨, ૩ અને ૭) દ્વારા 'શસ્ત્ર છોડો, શાંતિ અપનાવો' નામની એક વિશેષ ઝુંબેશ હાથ ધરવામાં આવી હતી. આ ઝુંબેશને જાગૃત નાગરિકો તરફથી ખૂબ જ સરાહનીય પ્રતિસાદ મળ્યો છે.

આ અભિયાન અંતર્ગત, શહેરના નાગરિકોએ પોતાની પાસે રહેલાં વિવિધ પ્રકારનાં ૪૭૭ જેટલાં હથિયારો પોલીસ સમક્ષ સ્વેચ્છાએ જમા કરાવ્યા છે. આ હથિયારોમાં તલવાર, છરા, ચપ્પુ, લાકડીઓ અને પાઇપ જેવી વસ્તુઓનો સમાવેશ થાય છે.

પોલીસ વિભાગે આ પહેલ દ્વારા સમાજમાં ભય મુક્ત વાતાવરણ ઊભું કરવાનો અને કાયદા પ્રત્યે લોકોનો વિશ્વાસ વધુ મજબૂત કરવાનો પ્રયાસ કર્યો છે. નાગરિકોની સક્રિય ભાગીદારીએ આ ઝુંબેશને સફળ બનાવવામાં મહત્વનો ફાળો આપ્યો છે.