કર્જત સ્ટેશન પર કોયના એક્સપ્રેસમાં ધુમાડો નીકળતાં મુસાફરોમાં અફરાતફરી

શનિવારે કર્જત રેલવે સ્ટેશન પર કોયના એક્સપ્રેસ ટ્રેનમાં બ્રેક-બાઇન્ડિંગની સમસ્યા સર્જાતા ભારે ધુમાડો નીકળ્યો હતો. આ ઘટનાને કારણે ટ્રેનમાં મુસાફરી કરી રહેલા મુસાફરોમાં અફરાતફરીનો માહોલ સર્જાયો હતો અને ગભરાઈને કેટલાક મુસાફરો ટ્રેનમાંથી નીચે ઉતરી ગયા હતા.

સેન્ટ્રલ રેલવેના અધિકારીઓએ જણાવ્યું હતું કે, બ્રેક-બાઇન્ડિંગની સમસ્યાને કારણે નીકળેલા ધુમાડાને પગલે ટ્રેનને કર્જત સ્ટેશન પર લગભગ ૧૦ મિનિટ સુધી રોકી દેવામાં આવી હતી. રેલવેના કર્મચારીઓએ તાત્કાલિક પરિસ્થિતિને કાબૂમાં લેવા માટે જરૂરી પગલાં ભર્યા હતા.

આ ઘટનામાં સદનસીબે કોઈ પણ મુસાફરને ઈજા થઈ નહોતી. રેલવે અધિકારીઓ દ્વારા પરિસ્થિતિનું મૂલ્યાંકન કરવામાં આવ્યું હતું અને ટ્રેનને સુરક્ષિત રીતે આગળ વધારવામાં આવી હતી. આ ઘટનાના કારણે ટ્રેન વ્યવહાર પર નજીવો અસર થયો હતો.