ઈડર પોલીસે NDPS એક્ટ હેઠળ છેલ્લા એક વર્ષથી નાસતા ફરતા રીઢા આરોપીને ઝડપી પાડ્યો

સાબરકાંઠા જિલ્લામાં નાસતા ફરતા આરોપીઓને પકડી પાડવા માટે ચલાવવામાં આવી રહેલી ખાસ ઝુંબેશ અંતર્ગત ઈડર પોલીસ ટીમને મોટી સફળતા સાંપડી છે. ખેડબ્રહ્મા પોલીસ સ્ટેશનમાં નોંધાયેલા NDPS એક્ટના ગંભીર ગુનામાં છેલ્લા એક વર્ષથી પોલીસને ચકમો આપી નાસતો ફરતો આરોપી નમોનારાયણ ઉર્ફે હરસિદ્ધ ભાટીને ઈડર સર્વેલન્સ સ્ટાફે ટેકનિકલ અને ચોક્કસ બાતમીના આધારે વિજયનગર ત્રણ રસ્તા પાસેથી ઝડપી પાડ્યો છે.

ગાંધીનગર રેન્જ નાયબ પોલીસ મહાનિરીક્ષક શ્રી વિરેન્દ્રસિંહ યાદવ તથા સાબરકાંઠા જિલ્લા પોલીસ અધિક્ષક ડો. પાર્થરાજસિંહ ગોહિલ દ્વારા નાસતા ફરતા ગુનેગારોને પકડવા આપેલી સુચનાના આધારે ઈડર ડીવાયએસપી સ્મિત ગોહીલના માર્ગદર્શન હેઠળ આ કાર્યવાહી કરવામાં આવી હતી.

આરોપી નમોનારાયણ ઉર્ફે હરસિદ્ધ ભાટી રાજસ્થાનના આબુરોડનો રહેવાસી છે અને ખેડબ્રહ્મા પોલીસ સ્ટેશનમાં NDPS એક્ટ હેઠળ નોંધાયેલા ગુનામાં છેલ્લા એક વર્ષથી વોન્ટેડ હતો. ઈડર પોલીસે તેને સફળતાપૂર્વક ઝડપી પાડી કાયદેસરની કાર્યવાહી હાથ ધરી છે.