અમદાવાદ LCB ઝોન-૭ દ્વારા પ્રોહિબિશનના વોન્ટેડ આરોપીને વેજલપુરથી ઝડપી પાડ્યો

અમદાવાદ શહેર પોલીસ કમિશનર અને સંયુક્ત પોલીસ કમિશનર (સેક્ટર-૧) દ્વારા ગુનાખોરી ડામવા માટે નાસતા ફરતા આરોપીઓને પકડવાની ખાસ ઝુંબેશ શરૂ કરવામાં આવી છે. આ ઝુંબેશના ભાગરૂપે, DCP ઝોન-૭ શ્રી શિવમ વર્માના માર્ગદર્શન હેઠળ અમદાવાદ LCB ઝોન-૭ ની ટીમે પ્રોહિબિશનના ગુનામાં લાંબા સમયથી નાસતા ફરતા એક રીઢા આરોપીને વેજલપુર વિસ્તારમાંથી ઝડપી પાડ્યો છે.

ચોક્કસ બાતમીના આધારે આ કાર્યવાહી કરવામાં આવી હતી. LCB ઝોન-૭ ના પોલીસ સબ ઇન્સ્પેક્ટર એચ.ડી. વાઘેલા અને તેમની ટીમ પેટ્રોલિંગ કરી રહી હતી. તે દરમિયાન ASI નસરૂલ્લાખાન, હેડ કોન્સ્ટેબલ મહેન્દ્રસિંહ અને પોલીસ કોન્સ્ટેબલ ઇરફાનભાઈને મળેલી બાતમીના આધારે પોલીસે વેજલપુર વિસ્તારમાં તપાસ હાથ ધરી હતી અને આરોપીને દબોચી લીધો હતો.

પકડાયેલ આરોપી ખેડા જિલ્લાના માતર પોલીસ સ્ટેશનમાં પ્રોહિબિશન એક્ટ હેઠળ નોંધાયેલા ગુનામાં છેલ્લા ઘણા સમયથી વોન્ટેડ હતો અને પોલીસ તેને શોધી રહી હતી. આ સફળ કાર્યવાહીથી LCB ઝોન-૭ ની ટીમે ગુનાખોરી ડામવામાં મહત્વની ભૂમિકા ભજવી છે.