સુરતના ભાવેશ લાઠિયાને અમેરિકાની ફેડરલ કોર્ટે 54 મહિનાની જેલ સજા, $24,560 દંડ

બ્રુકલિન ફેડરલ કોર્ટે 37 વર્ષીય ભાવેશ લાઠિયાને ફેન્ટાનિલ ડ્રગ્સ રેકેટમાં તેના ભાગ માટે 54 મહિનાની જેલ અને 24,560 ડોલરનો દંડ ફટકાર્યો. આ સજા અમેરિકાની ફેડરલ ન્યાયિક પ્રણાલીમાં કરવામાં આવી છે.

તપાસ મુજબ લાઠિયાએ સુરતના અમરોલી-છાપરાભાઠા વિસ્તારમાં આવેલી ઓફિસમાંથી નેટવર્ક ચલાવ્યું હતું. પ્લુટો બિઝનેસ સેન્ટરની દુકાન નંબર-7માંથી કામગીરી થતી હોવાનો આરોપ છે.

મેકસિકોની કુખ્યાત ‘સિનાલોઆ કાર્ટેલ’ સાથે સંપર્ક હોવાનો આરોપ છે અને ફેન્ટાનિલ બનાવવા માટે ઉપયોગમાં લેવાતા કેમિકલની ગેરકાયદે સપ્લાયનો કેસ છે. ફેબ્રુઆરી 2024માં 100 કિલો કેમિકલ મેકસિકો ડ્રગ સ્મગલરને મોકલ્યાનો આરોપ પણ છે.

રેક્સ્ટર કેમિકલ્સના સરનામાની તપાસમાં શંકાસ્પદ વિગતો સામે આવી, જ્યાં કેમિકલ ફેક્ટરીના બદલે રહેણાંક વિસ્તાર અને ઝૂંપડપટ્ટી જોવા મળી. લાઠિયાએ શેલ કંપની મારફતે નેટવર્ક ચલાવ્યું, જે એક્સપોર્ટર અને મેન્યુફેક્ચરર તરીકે નોંધાયેલ હતી, 50 લાખ રૂપિયાનો ટર્નઓવર અને 30 કર્મચારીઓનો દાવો કર્યો. ફાર્માસ્યુટિકલની ડિગ્રી ધરાવતા લાઠિયાએ કેમિકલની ટેકનિકલ જાણકારીનો ઉપયોગ પ્રતિબંધિત કેમિકલ સપ્લાય માટે કર્યો હોવાનો આરોપ છે.