લાઠી નજીક ST ડ્રાઈવરે જીવના જોખમે વિદ્યાર્થીનો જીવ બચાવ્યો

અમરેલી જિલ્લાના લાઠી નજીક ગઈકાલે એક હૃદય કંપાવનારી ઘટના બની હતી. અગમ્ય કારણોસર એક વિદ્યાર્થીએ ટ્રેન નીચે ઝંપલાવી આપઘાતનો પ્રયાસ કર્યો હતો. ટ્રેન તરત જ ઉભી રહી ગઈ હતી, પરંતુ વિદ્યાર્થી એન્જિન નીચે ગંભીર રીતે ફસાઈ ગયો હતો.

એન્જિન ખૂબ ગરમ હોવાથી કોઈ નજીક જઈ શકતું નહોતું. એ જ સમયે ત્યાંથી પસાર થતી ઢસા-લાઠી રુટની ST બસના બહાદુર ડ્રાઈવર રફિકભાઈ ગાગદાણીએ માનવતા દાખવી. પોતાના જીવના જોખમે ધગધગતા એન્જિન નીચે ઘુસીને વિદ્યાર્થીને સકુશળ બહાર કાઢ્યો હતો.

વિદ્યાર્થીને માથાના ભાગે ઈજા થતાં તાત્કાલિક લાઠી હોસ્પિટલ અને ત્યારબાદ રાજકોટ ખસેડવામાં આવ્યો છે. હાલ તેની હાલત સ્થિર હોવાનું જાણવા મળે છે.

સમગ્ર પંથકમાં ST ડ્રાઈવર રફિકભાઈની બહાદુરીને બિરદાવવામાં આવી રહી છે.