અમરેલી SPનો 112 પર સરપ્રાઈઝ ટેસ્ટ: માત્ર 90 સેકન્ડમાં પોલીસ ઘટનાસ્થળે

અમરેલી: અમરેલી જિલ્લા પોલીસ અધિક્ષક સંજય ખરાતે ગઈકાલે સાંજે 112 ઈમરજન્સી સેવાની કામગીરી ચકાસવા માટે એક અનોખો સરપ્રાઈઝ ટેસ્ટ કર્યો હતો. SP ખરાતે કંટ્રોલ રૂમમાં ફોન કરવાને બદલે સીધો 112 પર કોલ કરીને "ઝઘડો થયો છે, તાત્કાલિક પોલીસ મોકલો!" તેમ જણાવ્યું અને લોકેશન તરીકે SP ઓફિસનું જ એડ્રેસ આપ્યું.

SPના કોલ મળતાની સાથે જ 112 જનરક્ષક વાન તુરંત હરકતમાં આવી અને માત્ર દોઢ મિનિટ (90 સેકન્ડ)માં SP કચેરી ખાતે પહોંચી ગઈ. પોલીસની આ ઝડપી અને સજ્જ કામગીરી જોઈને SP ખરાત પણ ખુશ થયા અને ટીમને તેમની કામગીરી બદલ બિરદાવી હતી.

આ સરપ્રાઈઝ ટેસ્ટ દ્વારા SP ઓફિસના એડ્રેસ પર 112 નો રિસ્પોન્સ ટાઈમ તપાસવામાં આવ્યો હતો અને પોલીસ ટીમની ત્વરિત પ્રતિક્રિયા સાબિત થઈ હતી. પોલીસ તંત્રના જણાવ્યા અનુસાર, અમરેલી જિલ્લામાં 112 સેવા 24 કલાક કાર્યરત છે અને દરરોજ 40 થી વધુ કોલ આવે છે.

આ ટેસ્ટના પરિણામો પરથી સ્પષ્ટ થાય છે કે ઈમરજન્સી સમયે નાગરિકોને ઝડપી અને અસરકારક મદદ મળી રહી છે, જે પોલીસ વિભાગની કાર્યક્ષમતા દર્શાવે છે.