બોટાદમાં લાયસન્સ વિના ફટાકડાનું વેચાણ કરતા બે વેપારીઓ SOGની જાળમાં ઝડપાયા, ₹5.58 લાખથી વધુનો મુદ્દામાલ જપ્ત

બોટાદ શહેરમાં જન્માષ્ટમી જેવા તહેવારો નજીક આવી રહ્યા છે ત્યારે ગેરકાયદેસર વિસ્ફોટક પદાર્થોના વેચાણ સામે પોલીસ સક્રિય બની છે. બોટાદ SOG (સ્પેશિયલ ઓપરેશન્સ ગ્રુપ) ની ટીમે બાતમીના આધારે કાર્યવાહી કરતા લાયસન્સ વિના ફટાકડાનું વેચાણ કરતા બે વેપારીઓને ઝડપી પાડ્યા છે.

પોલીસે ઝડપાયેલા આરોપીઓ પૈકી જેન્નીભાઈ સોમાભાઈ ખાંટ (રહે. બોટાદ પરા વિસ્તાર, પિંજારા ચોક, પાવર હાઉસ પાસે, બોટાદ) અને રિયાજભાઈ મનસુખભાઈ રફાઈ (રહે. બોટાદ ખોજાવાડી, મેમણ કોલોની પાછળ, બોટાદ) પાસેથી વિવિધ પ્રકારના ફટાકડા સહિત કુલ ₹5,58,776 ની કિંમતનો મુદ્દામાલ કબજે કર્યો છે. આ કાર્યવાહી એક્સપ્લોઝિવ એક્ટ હેઠળ કરવામાં આવી છે અને ગુનો નોંધી કાયદેસરની કાર્યવાહી હાથ ધરવામાં આવી છે.

પોલીસે લોકોને અપીલ કરી છે કે તહેવારો દરમિયાન સાવચેત રહેવું જોઈએ અને લાયસન્સ વિના ફટાકડાનું વેચાણ કરવું કે ખરીદવું ગેરકાયદેસર તેમજ જીવન માટે જોખમી છે. કાયદાનું ઉલ્લંઘન કરનારાઓ સામે પોલીસ દ્વારા કડક કાર્યવાહી કરવામાં આવશે.