श्रीयांश संस्थेचा आवाहन: मोबाईलच्या पडद्यापेक्षा मुलांसाठी मैदान अधिक महत्त्वाचे

आज विकसित देशांमध्ये मुलांना लहान वयापासूनच खेळ, विज्ञान, संशोधन, कला आणि कौशल्य विकासासाठी प्रोत्साहन दिले जाते. यामुळे मुले शारीरिकदृष्ट्या सक्षम, मानसिकदृष्ट्या मजबूत आणि जागतिक स्तरावर स्पर्धा करण्यास तयार होतात. त्यामुळे खेळ हा शिक्षणाचा अविभाज्य भाग मानला जातो. मात्र, भारतात अपार प्रतिभा असूनही अनेक मुलांचा वाढता स्क्रीन टाइम आणि सोशल मीडियाकडे वाढलेले आकर्षण चिंतेचा विषय आहे. अनेक मुले रील्स तयार करण्यात किंवा सतत मोबाईल वापरण्यात वेळ घालवतात. तंत्रज्ञानाचा वापर उपयुक्त असला तरी तो शिक्षण, खेळ, आरोग्य आणि सर्वांगीण विकासाचा पर्याय ठरू नये, असे मत व्यक्त करण्यात आले आहे.

पालकांनी मुलांना फक्त मोबाईल देण्याऐवजी त्यांना मैदानावर खेळण्यासाठी, वाचनासाठी, सांस्कृतिक कार्यक्रमांमध्ये, विज्ञान प्रदर्शनांमध्ये आणि इतर सकारात्मक उपक्रमांमध्ये सहभागी होण्यासाठी प्रोत्साहित करणे आवश्यक आहे. मुलांच्या आवडी जोपासताना त्यांचा शारीरिक, मानसिक आणि सामाजिक विकासही तितकाच महत्त्वाचा आहे. आज भारताला अधिकाधिक उत्कृष्ट खेळाडू, संशोधक, वैज्ञानिक आणि जबाबदार नागरिकांची गरज आहे. त्यासाठी प्रत्येक गावात खेळाची संस्कृती रुजवणे, क्रीडा सुविधा उपलब्ध करून देणे आणि मुलांना मैदानी खेळांकडे वळवणे ही काळाची गरज आहे.

श्रीयांश बहुउद्देशीय संस्था ग्रामीण भागातील मुलांमध्ये क्रीडा, शिक्षण, आरोग्य आणि व्यक्तिमत्त्व विकासाला चालना देण्यासाठी सातत्याने प्रयत्नशील आहे. संस्थेच्या संस्थापक व अध्यक्ष प्रशांत अशोक प्रधान यांनी आपल्या विधानात म्हटले आहे की, "आज मैदानावर घाम गाळणारी मुलेच उद्या देशासाठी पदके जिंकतील आणि राष्ट्राचा अभिमान वाढवतील." त्यांनी सर्वजणांना मुलांच्या हातात फक्त मोबाईल नव्हे, तर चेंडू, पुस्तक, बॅट, रॅकेट आणि उज्ज्वल भविष्याची स्वप्ने देण्याचे आवाहन केले आहे.