સુરતમાં ૭૦ વર્ષીય ખેડૂતના મોબાઈલમાંથી ₹2.27 લાખની ઓનલાઈન છેતરપિંડી

સુરત જિલ્લાના અંબિકા તાલુકાના વાંસકુઈ ગામમાં રહેતા ૭૦ વર્ષીય ખેડૂત ભાણાભાઈ ભીખાભાઈ પટેલ સાથે ઓનલાઈન છેતરપિંડીનો બનાવ બન્યો છે. તેમનો મોબાઈલ ફોન ગુમ થયા બાદ એક અજાણ્યા ઠગે તેમના ત્રણ જુદા જુદા બેંક ખાતાઓમાંથી કુલ ₹2,27,500 ની રકમ ઓનલાઈન ઉપાડી લીધી હતી.

આ ઘટના ૦૮ ઓગસ્ટ ૨૦૨૬ થી ૦૧ સપ્ટેમ્બર ૨૦૨૬ દરમિયાન બની હોવાનું સામે આવ્યું છે. ઠગે બેંક ઓફ બરોડાની ગુણસવેલ શાખાના ખાતામાંથી ₹71,500, બેંક ઓફ બરોડાની બારડોલી શાખામાંથી ₹98,000 અને સેન્ટ્રલ બેંક ઓફ ઈન્ડિયાના ખાતામાંથી ₹58,000 ની રકમ ટ્રાન્સફર કરી લીધી હતી.

આ સમગ્ર ઘટના અંગે ભાણાભાઈ પટેલે અનાવલ પોલીસ મથકે અજાણ્યા આરોપી વિરુદ્ધ ફરિયાદ નોંધાવી છે. પોલીસે ભારતીય ન્યાય સંહિતા (BNS) ૨૦૨૩ ની કલમ-૩૧૮(૪) તથા આઈટી એક્ટની કલમ-૬૬(C), ૬૬(D) હેઠળ ગુનો નોંધી કાયદેસરની કાર્યવાહી હાથ ધરી છે. પોલીસ ઈન્સપેક્ટર કે.સી. પારગી આ કેસની વધુ તપાસ કરી રહ્યા છે.