ગાંધીધામ: ફોર્ચ્યુનર કારમાંથી ₹13.42 લાખથી વધુનો દારૂ-બિયરનો જથ્થો ઝડપાયો

ગાંધીધામ બી ડિવિઝન પોલીસ દ્વારા કરવામાં આવેલી કાર્યવાહીમાં એક ફોર્ચ્યુનર કારમાંથી ₹3.42 લાખથી વધુનો વિદેશી દારૂ અને બિયરનો જથ્થો ઝડપી પાડવામાં આવ્યો છે. પોલીસ પેટ્રોલિંગ દરમિયાન નૂરી મસ્જિદ કટ પાસે એક ફોર્ચ્યુનર કાર (નંબર GJ-18-BJ-9408) શંકાસ્પદ જણાતા પોલીસે તેને રોકવાનો પ્રયાસ કર્યો હતો.

જોકે, કાર ચાલકે પોલીસને જોઈને કાર પુરઝડપે ભગાવી મૂકી હતી. પોલીસે પીછો કરતા ચાલકે કારને સર્વિસ રોડ પરથી યુ-ટર્ન લઈ ચુંગી નાકા તરફ ભગાવી હતી. ચુંગી નાકા પાસે કારનું ટાયર ફાટી જતા ચાલક કારને ત્યાં જ મૂકીને અંધારાનો લાભ ઉઠાવી ફરાર થવામાં સફળ રહ્યો હતો.

પોલીસે કારની તલાશી લેતા અંદરથી અલગ-અલગ બ્રાન્ડનો વિદેશી દારૂ અને બિયરના ટીન મળી કુલ 59 પેટીનો જથ્થો મળી આવ્યો હતો. પોલીસે આ દારૂ-બિયરના જથ્થા ઉપરાંત ફોર્ચ્યુનર કાર સહિત કુલ ₹13,42,580નો મુદ્દામાલ કબજે કર્યો છે. પોલીસે ફરાર થયેલા ચાલકને ઝડપી પાડવા માટે વધુ તપાસ હાથ ધરી છે.