ઉત્રાણ પોલીસે નવરાત્રી-દિવાળી પહેલાં નકલી ઘી બનાવતું કારખાનું ઝડપી પાડ્યું, ₹૧૮ લાખથી વધુનો મુદ્દામાલ જપ્ત

સુરત નજીક ઉત્રાણ પોલીસે નવરાત્રી અને દિવાળીના તહેવારોને ધ્યાનમાં રાખીને એક મોટી કાર્યવાહી કરી છે. પોલીસે અબ્રામા વિસ્તારમાં દરોડો પાડી એક શંકાસ્પદ ઘી બનાવતા કારખાનાનો પર્દાફાશ કર્યો છે. આ રેડ દરમિયાન પોલીસે ત્રણ ઈસમોને ઝડપી પાડ્યા હતા.

ફૂડ સેફ્ટી અધિકારીઓની મદદથી કરવામાં આવેલી આ કાર્યવાહીમાં, પોલીસે ઘીનો જથ્થો, ઘી બનાવવા માટે વપરાતો કાચો માલ અને બનાવટમાં વપરાતી મશીનરી સહિત કુલ ₹૧૮,૨૧,૧૬૩ રૂપિયાનો મુદ્દામાલ જપ્ત કર્યો છે. આ જપ્ત કરાયેલા મુદ્દામાલ બાદ પોલીસે આગળની કાયદેસરની કાર્યવાહી હાથ ધરી છે.

તહેવારોના દિવસોમાં ભેળસેળયુક્ત ખાદ્ય પદાર્થોનું વેચાણ વધી જતું હોય છે, ત્યારે પોલીસની આ કાર્યવાહીથી ભેળસેળખોરોમાં ફફડાટ ફેલાયો છે. ઉત્રાણ પોલીસ દ્વારા કરવામાં આવેલી આ કાર્યવાહીને સ્થાનિક લોકો દ્વારા આવકારવામાં આવી રહી છે.