પેટલાદમાં ભારે વરસાદને કારણે નગરપાલિકા દ્વારા રેડ એલર્ટ જાહેર

પેટલાદ શહેરના નાગરિકોને હવામાન ખાતાની આગાહી મુજબ આગામી 30 જુલાઈથી 2 ઓગસ્ટ 2026 સુધી ભારે વરસાદની શક્યતા અંગે ચેતવણી આપવામાં આવી છે. નગરપાલિકા દ્વારા જાહેર કરાયેલા રેડ એલર્ટમાં જણાવાયું છે કે, આ સમયગાળા દરમિયાન હવામાન સિસ્ટમ વધુ સક્રિય રહેશે, જેના કારણે નાગરિકોની જાનમાલની સુરક્ષા માટે સ્થળાંતર કરવાનું અનિવાર્ય છે.

જર્જરિત મકાનોમાં રહેતા અને નીચાણવાળા વિસ્તારોના નાગરિકોને ખાસ ધ્યાન રાખવા માટે જણાવ્યું છે. સુરક્ષિત સ્થળે સ્થળાંતર માટે પેટલાદ નગરપાલિકા દ્વારા એન.કે. હાઈસ્કૂલ અને મ્યુનિસિપલ કોમ્યુનિટી હોલને સ્થળાંતર કેન્દ્ર તરીકે નિર્ધારિત કરવામાં આવ્યા છે.

નગરપાલિકા દ્વારા નાગરિકોને અપીલ કરવામાં આવી છે કે તેઓ તંત્રની સૂચનાઓનું પાલન કરે અને જોખમી સ્થળોએ રહેવાનું ટાળે. પોતાની અને પરિવારની સુરક્ષાને સર્વોચ્ચ પ્રાથમિકતા આપવાની વિનંતી કરવામાં આવી છે.