🔥 TRENDING ରାଜନଗର କଣି ଛକ ରେ ସଡ଼କ ଦୃଘଟଣା શિનોર ગામમાં નવું પાણીનું બોરિંગ, વિકા... CM Omar Abdullah to Inaugurate 13 Proj... अखिलेश यादव की आगरा यात्रा पर भीड़भाड़... LeT commander Lateef Bhat cornered in... पुराने बर्तन नए बनाने का झांसा देकर मह...
18 Nov 2026•
ગુજરાતી मराठी ਪੰਜਾਬੀ বাংলা
Travel

ଏଣିକି ନୂଆ ଗାଡ଼ି କିଣିବା ପାଇଁ ଦେବାକୁ ପଡ଼ିବ ପାର୍କିଂ ପ୍ରମାଣପତ୍ର: ଆସିଲା ନୂଆ ପଲିସି, ସହରରେ ମନଇଚ୍ଛା ପାର୍କିଂ ଉପରେ ଲାଗିବ ରୋକ୍

✍️ Reporter: Deepak Mahapatra 🗓 18 Nov 2026, 11:25 AM 👁 12
Share: 💬 WhatsApp 📘 Facebook 𝕏 Post
ଗାଡ଼ି ପାର୍କିଂ କରିବା ପାଇଁ ଜାଗା ନଥିଲେ ଏଣିକି ନୂଆ ଗାଡ଼ି କିଣିବା ସହଜ ହେବ ନାହିଁ। ଘରୋଇ ଗାଡ଼ି ସଂଖ୍ୟାରେ ଅହେତୁକ ବୃଦ୍ଧି ଓ ରାସ୍ତାକଡ଼ରେ ବେଆଇନ ପାର୍କିଂ ଯୋଗୁଁ ସୃଷ୍ଟି ହେଉଥିବା ଉତ୍କଟ ଟ୍ରାଫିକ୍ ଜାମକୁ ନିୟନ୍ତ୍ରଣ କରିବା ପାଇଁ ରାଜ୍ୟ ସରକାର ସହରାଂଚଳ ପାଇଁ ଏକ ନୂଆ ପାର୍କିଂ ପଲିସି ଆଣିଛନ୍ତି। ଏହି ନୂଆ ପଲିସି ବା ନୀତି ଅନୁଯାୟୀ ନୂଆ ଘରୋଇ ଗାଡ଼ି ପଞ୍ଜିକରଣ କରିବା ପୂର୍ବରୁ ଗାଡ଼ି ମାଲିକ ନିଜସ୍ୱ ପାର୍କିଂ ସ୍ଥାନ ଥିବାର ପ୍ରମାଣପତ୍ର ଦେଖାଇବା ବାଧ୍ୟତାମୂଳକ ହେବ।
ଗୃହ ଓ ନଗର ଉନ୍ନୟନ ବିଭାଗ ପକ୍ଷରୁ ପ୍ରକାଶିତ ଚିଠା ‘ଓଡ଼ିଶା ଅର୍ବାନ ପାର୍କିଂ ପଲିସି-୨୦୨୬’ର ବିଜ୍ଞପ୍ତି ଅନୁଯାୟୀ, ରାଜ୍ୟର ବିଭିନ୍ନ ସହରରେ ଗାଡ଼ି ସଂଖ୍ୟା ବୃଦ୍ଧି ବେଶ୍ ଚିନ୍ତାଜନକ ରହିଛି। ୨୦୧୭-୧୮ ଆର୍ଥକ ବର୍ଷରେ ଓଡ଼ିଶାରେ ପଞ୍ଜିକୃତ ମୋଟର ଯାନ ସଂଖ୍ୟା ୯୧.୩ ଲକ୍ଷ ଥିବାବେଳେ ୨୦୨୩-୨୪ ସୁଦ୍ଧା ଏହା ୬୫ ପ୍ରତିଶତରୁ ଅଧିକ ବୃଦ୍ଧି ପାଇ ୧.୫ କୋଟି ଟପିଛି। କେବଳ ଭୁବନେଶ୍ୱର କିମ୍ବା କଟକ ନୁହେଁ ବରଂ ରାଉରକେଲା, ସମ୍ବଲପୁର, ବ୍ରହ୍ମପୁର ଓ ବାଲେଶ୍ୱର ଭଳି ପ୍ରମୁଖ ସହରଗୁଡ଼ିକରେ ମଧ୍ୟ ରାସ୍ତାକଡ଼ ପାର୍କିଂ ଯୋଗୁଁ ସାଧାରଣ ଲୋକଙ୍କ ଯାତାୟାତ ବାଧାପ୍ରାପ୍ତ ହେଉଛି।

ସହରାଂଚଳରେ ହେଉଥିବା ମୋଟ ଟ୍ରାଫିକ୍ ଭିଡ଼ର ପ୍ରାୟ ୩୦ ପ୍ରତିଶତ କେବଳ ପାର୍କିଂ ସ୍ଥାନ ଖୋଜୁଥିବା ଗାଡ଼ିଗୁଡ଼ିକ ଯୋଗୁଁ ହେଉଛି। ଏହି ସମସ୍ୟାର ସ୍ଥାୟୀ ସମାଧାନ ପାଇଁ ରାଜ୍ୟର ସମସ୍ତ ଉନ୍ନୟନ କର୍ତ୍ତୃପକ୍ଷ ଅଂଚଳ, ସ୍ୱତନ୍ତ୍ର ଯୋଜନା ଅଂଚଳ ଓ ପୌରାଂଚଳଗୁଡ଼ିକରେ ଏହି ନୂଆ ନୀତି କାର୍ଯ୍ୟକାରୀ କରିବାକୁ ଯୋଜନା ହୋଇଛି।
ଏହି ନୂଆ ପାର୍କିଂ ନୀତିରେ ପାର୍କିଂ ପ୍ରମାଣପତ୍ର ବ୍ୟତୀତ ଆହୁରି ଅନେକ କଠୋର ନିୟମାବଳୀ ରହିଛି। ଅଧିକ ଜନବହୁଳ ବିଶିଷ୍ଟ ଆବାସିକ ଅଂଚଳଗୁଡ଼ିକରେ ରାସ୍ତାକଡ଼ ଓ ରାତ୍ରିକାଳୀନ ପାର୍କିଂକୁ ନିୟନ୍ତ୍ରଣ କରିବା ପାଇଁ ‘ରେସିଡେନ୍ସିଆଲ୍ ପାର୍କିଂ ପରମିଟ୍‌’ ବ୍ୟବସ୍ଥା ଲାଗୁ କରାଯିବ। ଏଥିରେ ପ୍ରତି ପରିବାର ବା ପ୍ରତିଷ୍ଠାନ ପିଛା ପରମିଟ୍ ସଂଖ୍ୟା ସୀମିତ ରଖାଯିବା ସହ ନିର୍ଦ୍ଦିଷ୍ଟ ଦେୟ ଆଦାୟ କରାଯିବ, ଯାହାଫଳରେ ଗୋଟିଏ ପରିବାରରେ ଅତ୍ୟଧିକ ଗାଡ଼ି ରଖିବା ପ୍ରବୃତ୍ତି ଉପରେ ଅଙ୍କୁଶ ଲାଗିପାରିବ। ଏହାସହିତ ଆବାସିକ ଅଂଚଳରେ ୧୨ ମିଟରରୁ କମ୍ ଚଉଡ଼ା ଥିବା ରାସ୍ତାରେ ପାର୍କିଂକୁ ସମ୍ପୂର୍ଣ୍ଣ ନିଷିଦ୍ଧ କରାଯାଇଛି। ବ୍ୟସ୍ତବହୁଳ ବାଣିଜ୍ୟିକ ଅଂଚଳ ଓ ସେଣ୍ଟ୍ରାଲ୍ ବିଜନେସ୍ ଡିଷ୍ଟ୍ରିକ୍ଟଗୁଡ଼ିକରେ ଅଧିକ ପାର୍କିଂ ଶୁଳ୍କ, କଠୋର ସମୟ ସୀମା ଓ ଭିଡ଼ ସମୟରେ କଞ୍ଜେସନ୍ ଫି’ ଆଦାୟ କରିବାକୁ ପ୍ରସ୍ତାବ ରହିଛି।

ରାସ୍ତାକଡ଼ (ଅନ୍‌-ଷ୍ଟ୍ରିଟ୍‌) ପାର୍କିଂ ଉପରେ ଚାପ କମାଇବା ପାଇଁ ଅଫ୍‌-ଷ୍ଟ୍ରିଟ୍ ବା ନିର୍ଦ୍ଧାରିତ ପାର୍କିଂ ସ୍ଥଳର ବିକାଶ ଉପରେ ଗୁରୁତ୍ୱ ଦିଆଯାଇଛି। ଲୋକଙ୍କୁ ଅଫ୍‌-ଷ୍ଟ୍ରିଟ୍ ପାର୍କିଂ ବ୍ୟବହାର କରିବାକୁ ଉତ୍ସାହିତ କରିବା ପାଇଁ ଏହାର ଦେୟ ଅନ୍‌-ଷ୍ଟ୍ରିଟ୍ ପାର୍କିଂ ତୁଳନାରେ ୨୫ ପ୍ରତିଶତ ଶସ୍ତା ରଖାଯିବ ଓ ଅଫ୍‌-ଷ୍ଟ୍ରିଟ୍ ପାର୍କିଂ ସ୍ଥଳର ୧୦୦ ମିଟର ପରିଧି ମଧ୍ୟରେ ରାସ୍ତାକଡ଼ ପାର୍କିଂକୁ ନିଷିଦ୍ଧ କରାଯିବ। ଏହାବ୍ୟତୀତ ଦିନବେଳା ଅଫିସ୍ ଓ ରାତିରେ ଆବାସିକ ବ୍ୟବହାର ପାଇଁ ‘ସେୟାର୍ଡ ପାର୍କିଂ’ ବ୍ୟବସ୍ଥାକୁ ପ୍ରୋତ୍ସାହନ ଦିଆଯିବ। ସମସ୍ତ ନୂଆ ପାର୍କିଂ ସ୍ଥଳରେ ଇଲେକ୍ଟ୍ରିକ୍ ଯାନ (ଇଭି) ଚାର୍ଜିଂ ସୁବିଧା ବାଧ୍ୟତାମୂଳକ କରାଯାଇଥିବାବେଳେ ଦିବ୍ୟାଙ୍ଗ ବ୍ୟକ୍ତିମାନଙ୍କ ପାଇଁ ସ୍ୱତନ୍ତ୍ର ପାର୍କିଂ ସ୍ଥାନ ସଂରକ୍ଷିତ ରହିବ ଓ ସେମାନଙ୍କଠାରୁ କୌଣସି ଅତିରିକ୍ତ ଦେୟ ନିଆଯିବ ନାହିଁ।
ପାର୍କିଂ ବ୍ୟବସ୍ଥାକୁ ସମ୍ପୂର୍ଣ୍ଣ ସ୍ୱଚ୍ଛ ଓ ଡିଜିଟାଲ୍ କରିବା ପାଇଁ ମୋବାଇଲ୍ ଆପ୍ ଜରିଆରେ ରିଅଲ୍ ଟାଇମ୍ ପାର୍କିଂ ସ୍ଲଟ୍ ସୂଚନା, ଅନଲାଇନ୍ ବୁକିଂ ଓ କ୍ୟାସଲେସ୍ ପେମେଣ୍ଟ ବ୍ୟବସ୍ଥା କରାଯିବ। ପାର୍କିଂରୁ ଆଦାୟ ହେଉଥିବା ସମସ୍ତ ରାଜସ୍ୱକୁ କେବଳ ସହରର ଫୁଟପାଥ୍‌, ସାଇକେଲ ଟ୍ରାକ୍‌, ଇଭି ଚାର୍ଜିଂ ଷ୍ଟେସନ୍ ଓ ସାଧାରଣ ପରିବହନ ବ୍ୟବସ୍ଥାର ଉନ୍ନତି ପାଇଁ ଖର୍ଚ୍ଚ କରାଯିବ। ପଥଚାରୀଙ୍କ ଫୁଟପାଥ୍ ଅଧିକାରକୁ ସୁରକ୍ଷିତ ରଖିବା ସହ ନିୟମ ଉଲ୍ଲଂଘନକାରୀ(Parking Dispute)ଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ସ୍ୱରୂପ ମୋଟା ଅଙ୍କର ଜୋରିମାନା, ଗାଡ଼ି ଟୋଇଂ ଓ ବାରମ୍ବାର ନିୟମ ଭାଙ୍ଗିଲେ ଡ୍ରାଇଭିଂ ଲାଇସେନ୍ସ ରଦ୍ଦ ଭଳି କଠୋର ବ୍ୟବସ୍ଥା କରାଯାଇଛି।
ଏହି ନୀତିର ସଫଳ ରୂପାୟନ ପାଇଁ ମୁଖ୍ୟ ସଚିବଙ୍କ ଅଧ୍ୟକ୍ଷତାରେ ଏକ ଉଚ୍ଚସ୍ତରୀୟ ଆନ୍ତଃ-ବିଭାଗୀୟ ଷ୍ଟିଅରିଂ କମିଟି ଓ ପୌରାଂଚଳସ୍ତରରେ ମେୟର କିମ୍ବା କମିଶନରଙ୍କ ଅଧ୍ୟକ୍ଷତାରେ ‘ପାର୍କିଂ ସ୍ପେସ୍ ଡେଭଲପମେଣ୍ଟ ଆଣ୍ଡ ମ୍ୟାନେଜମେଣ୍ଟ କମିଟି’ ଗଠନ କରାଯିବ। ଏହି ଚିଠା ନୀତି ଗୃହ ଓ ନଗର ଉନ୍ନୟନ ବିଭାଗର ୱେବସାଇଟରେ ଉପଲବ୍ଧ ରହିଛି। ଓଡ଼ିଶା ଗେଜେଟରେ ଏହି ଚିଠା ନୀତି ପ୍ରକାଶିତ ହେବାର ୧୫ ଦିନ ମଧ୍ୟରେ ସାଧାରଣ ଲୋକ ଓ ଅଂଶୀଦାରମାନେ ନିଜର ମତାମତ କିମ୍ବା ଆପତ୍ତି ଅଭିଯୋଗ ଡାକ ଯୋଗେ, ବ୍ୟକ୍ତିଗତ ଭାବେ କିମ୍ବା ଇ-ମେଲ୍ ମାଧ୍ୟମରେ ପୌର ପ୍ରଶାସନ ନିର୍ଦ୍ଦେଶକଙ୍କ ନିକଟରେ ଦାଖଲ କରିପାରିବେ ବୋଲି ବିଭାଗ ପକ୍ଷରୁ କୁହାଯାଇଛି।
📲Get App