હિંમતનગર-ઈડર રોડ પર ફોર વ્હીલરની ટક્કરમાં યુવકનું મોત, ચાલક ફરાર

સાબરકાંઠા જિલ્લાના હિંમતનગર–ઈડર રોડ પર વધુ એક ગમખ્વાર અકસ્માતની ઘટના સામે આવી છે. આ માર્ગ પર પૂરઝડપે આવી રહેલા એક અજાણ્યા ફોર વ્હીલર વાહને બાઈક પર સવાર ૨૨ વર્ષીય યુવકને જોરદાર ટક્કર મારી હતી. અકસ્માત એટલો ગંભીર હતો કે યુવકને માથા અને શરીરના ભાગે ગંભીર ઈજાઓ પહોંચતાં તેનું ઘટનાસ્થળે જ કમકમાટીભર્યું મોત નીપજ્યું હતું.

પ્રાથમિક તપાસમાં મૃતક યુવક નિકોડા ગામનો વતની હોવાનું અનુમાન લગાવવામાં આવી રહ્યું છે, જ્યારે અકસ્માત સર્જાયા બાદ ફોર વ્હીલર ચાલક પોતાનું વાહન લઈને ઘટનાસ્થળેથી ફરાર થઈ ગયો હોવાની આશંકા છે. ઘટનાની જાણ થતાં જ આસપાસના લોકો એકઠા થઈ ગયા હતા અને તાત્કાલિક પોલીસને જાણ કરી હતી. માહિતી મળતાં જ હિંમતનગર ટ્રાફિક પોલીસ અને ગ્રામ્ય પોલીસનો કાફલો ઘટનાસ્થળે દોડી આવ્યો હતો.

પોલીસે મૃતદેહનો કબજો મેળવીને પોસ્ટમોર્ટમ અર્થે ખસેડવાની તજવીજ હાથ ધરી છે તેમજ અકસ્માત સર્જીને ફરાર થઈ ગયેલા અજાણ્યા વાહનચાલકને ઝડપી પાડવા માટે ચક્રો ગતિમાન કર્યા છે. બીજી બાજુ, હિંમતનગર–ઈડર રોડ પર દિન-પ્રતિદિન વધી રહેલા અકસ્માતોની વણઝારને પગલે સ્થાનિક રહીશો અને વાહનચાલકોમાં ભારે ચિંતા સાથે તંત્ર પ્રત્યે રોષ જોવા મળી રહ્યો છે.