ଏୟାର ଇଣ୍ଡିଆ ବିମାନକୁ ହାଇଜ୍ୟାକ୍ ଧମକ: ଜଣେ ଯାତ୍ରୀ ଗିରଫ

କୋଲକାତାରୁ ମୁମ୍ବାଇ ଯାଉଥିବା ଏୟାର ଇଣ୍ଡିଆ ବିମାନକୁ ହାଇଜ୍ୟାକ୍ କରିବାକୁ ମିଳିଥିବା ଧମକ ମାମଲାରେ ଜଣଙ୍କୁ ଗିରଫ କରାଯାଇଛି । ହାଇଜ୍ୟାକ୍ ମାମଲାରେ ଜଣେ ଯାତ୍ରୀଙ୍କୁ ଗିରଫ କରାଯାଇଥିବା ନେଇ ନେତାଜୀ ସୁଭାଷ ଚନ୍ଦ୍ର ବୋଷ ଅନ୍ତରାଷ୍ଟ୍ରୀୟ ବିମାନବନ୍ଦର ପକ୍ଷରୁ ଗୁରୁବାର ଏକ ପ୍ରେସ ବିବୃତ୍ତି ଜାରି କରାଯାଇ ସୂଚନା ପ୍ରଦାନ କରାଯାଇଛି ।
ଗିରଫ ଯାତ୍ରୀକୁ ଏୟାରପୋର୍ଟ ଥାନାକୁ ହସ୍ତାନ୍ତର କରାଯାଇଛି । ତେବେ ତାଙ୍କର ନାମ ଓ ପରିଚୟ ସମ୍ପୂର୍ଣ୍ଣ ଗୋପନୀୟ ରଖାଯାଇଛି । କାହିଁକି ଏଭଳି ଧମକ ଦେଇଥିଲେ ସେ ନେଇ କୌଣସି ବିସ୍ତୃତ ସୂଚନା ଦିଆଯାଇ ନାହିଁ ।
ଶୌଚାଳୟରୁ ମିଳିଥିଲା ଧମକପୂର୍ଣ୍ଣ ଚିଠି
ବୁଧବାର ସକାଳେ ଏୟାର ଇଣ୍ଡିଆ ବିମାନ ଏଆଇ ୨୭୭୨ କୋଲକାତାରୁ ମୁମ୍ବାଇ ଅଭିମୁଖେ ଯାତ୍ରା ଆରମ୍ଭ କରିବାକୁ ଥିବାବେଳେ ବିମାନ ଶୌଚାଳୟ ଭିତରେ ଏକ ହାଇଜ୍ୟାକ୍ କରିବା ଧମକ ପୂର୍ଣ୍ଣ ଚିଠି ମିଳିଥିଲା । ସକାଳ ୧୦.୩୭ ସମୟରେ କ୍ୟାବିନ୍ କ୍ର୍ୟୁ ସଦସ୍ୟ ଏହାକୁ ଦେଖିବା ପରେ ତୁରନ୍ତ ସୂଚନା ଦେଇଥିଲେ । ସୁରକ୍ଷା ଦୃଷ୍ଟିରୁ ଉଡ଼ାଣକୁ ବାତିଲ କରି ସମସ୍ତ ଯାତ୍ରୀଙ୍କୁ ବାହାର କରାଯାଇଥିଲା ।
ସେତେବେଳେ ବିମାନରେ ୧୦୫ ଜଣ ଯାତ୍ରୀ ଥିଲେ । ଯାଞ୍ଚ ସମୟରେ କୌଣସି ସନ୍ଦିଗ୍ଧ ସାମଗ୍ରୀ ମିଳିନଥିଲା । ସମସ୍ତ ସୁରକ୍ଷା ଯାଞ୍ଚ ସରିବା ପରେ ପୁଣି ଥରେ ନିର୍ଦ୍ଧାରିତ ସମୟର ୭ ଘଣ୍ଟା ପରେ ବିମାନଟି ଯାତ୍ରା ଆରମ୍ଭ କରିଥିଲା । ସନ୍ଧ୍ୟା ପ୍ରାୟ ୫ଟା ୩୮ ରେ ଉକ୍ତ ବିମାନଟି ମୁମ୍ବାଇ ଅଭିମୁଖେ ଉଡ଼ାଣ ଆରମ୍ଭ କରିଥିଲା ।