ଗୋବର୍ଦ୍ଧନ ପୂଜାରେ ମୋଦିଙ୍କ ନିଆରା ଅନ୍ଦାଜ, ଗାଈ ଓ ବାଛୁରୀଙ୍କୁ ଖୁଆଇଲେ ଘାସ

ପବିତ୍ର ଗୋବର୍ଦ୍ଧନ ପୂଜା ଅବସରରେ ଦେଶବାସୀଙ୍କୁ ହାର୍ଦ୍ଦିକ ଶୁଭେଚ୍ଛା ଜଣାଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ଏହି ଅବସରରେ ସେ ସୋସିଆଲ ମିଡିଆରେ କିଛି ବିଶେଷ ଫଟୋ ଶେୟାର କରିଛନ୍ତି। ଫଟୋଗୁଡ଼ିକରେ ମୋଦି ଗାଈ ଓ ତା'ର ବାଛୁରୀକୁ ଘାସ ଖୁଆଉଥିବାର ଦେଖିବାକୁ ମିଳିଛି।
ପ୍ରଧାନମନ୍ତ୍ରୀ ନିଜ ଇନଷ୍ଟାଗ୍ରାମ ପୋଷ୍ଟରେ ଲେଖିଛନ୍ତି ଯେ, ଗୋବର୍ଦ୍ଧନ ପୂଜାର ଏହି ପବିତ୍ର ଅବସର ସମସ୍ତଙ୍କ ଜୀବନରେ ଶାନ୍ତି, ସୁଖ ଓ ସମୃଦ୍ଧି ଆଣିଦେଉ। ଏହି ଫଟୋଗୁଡ଼ିକ କିଛି ବିଶେଷ ମୁହୂର୍ତ୍ତକୁ ମନେ ପକାଇଦେଉଥିବା ମଧ୍ୟ ସେ ଉଲ୍ଲେଖ କରିଛନ୍ତି।
କେବଳ ଫଟୋ ନୁହେଁ, ଏହି ଅବସରରେ ମୋଦି ଏକ ସୁନ୍ଦର ସଂସ୍କୃତ ଶ୍ଳୋକ ମଧ୍ୟ ଶେୟାର କରିଛନ୍ତି। ଶ୍ଳୋକଟି ହେଉଛି 'ଶ୍ରୀ ଗୋବର୍ଦ୍ଧନଧରାଷ୍ଟକମ'ର ଅଂଶ। ଏଥିରେ ଭଗବାନ ଶ୍ରୀକୃଷ୍ଣଙ୍କ ଗୋବର୍ଦ୍ଧନଧାରୀ ରୂପର ମହିମା ବର୍ଣ୍ଣନା କରାଯାଇଛି।
ଏହି ଶ୍ଳୋକରେ ଭଗବାନ ଶ୍ରୀକୃଷ୍ଣଙ୍କୁ ବ୍ରଜବାସୀଙ୍କ ପ୍ରାଣପ୍ରିୟ, ସତ୍ୟ ଓ ପରାକ୍ରମର ପ୍ରତୀକ ତଥା ଭକ୍ତଙ୍କ ଭୟ ଦୂର କରୁଥିବା ଦେବତା ଭାବେ ବର୍ଣ୍ଣନା କରାଯାଇଛି। ଗୋବର୍ଦ୍ଧନ ପର୍ବତ ଉଠାଇ ଭଗବାନ ଶ୍ରୀକୃଷ୍ଣ ବ୍ରଜବାସୀଙ୍କୁ ରକ୍ଷା କରିଥିବା ପୌରାଣିକ କଥାକୁ ମଧ୍ୟ ଏହା ମନେ ପକାଇଦିଏ।
ପ୍ରଧାନମନ୍ତ୍ରୀ ତାଙ୍କ ବାର୍ତ୍ତାରେ ଆହୁରି କାମନା କରିଛନ୍ତି ଯେ, ଏହି ପବିତ୍ର ପର୍ବ ସମସ୍ତଙ୍କ ଜୀବନରେ ନୂତନ ଶକ୍ତି ଓ ଉତ୍ସାହ ଭରିଦେଉ। ସମସ୍ତଙ୍କ ଘରେ ସୁଖ, ସୌଭାଗ୍ୟ ଓ ସମୃଦ୍ଧିର ପ୍ରସାର ହେଉ।