కడుపునొప్పి బాధ భరించలేక కర్నూలు జిల్లా యువకుడి ఆత్మహత్య

కర్నూలు జిల్లా గోనెగండ్ల మండలం గాజులదిన్నె గ్రామానికి చెందిన కందిన భరత్ (21) అనే యువకుడు మృతి చెందాడు. గత కొంతకాలంగా కడుపునొప్పితో బాధపడుతున్న భరత్ పలువురు వైద్యుల వద్ద చికిత్స చేయించినప్పటికీ నయం కాకపోవడంతో తీవ్ర మనస్తాపానికి గురైనట్లు తెలుస్తోంది.

ఈ క్రమంలో జీవితంపై విరక్తి చెంది గత నెల 29వ తేదీ రాత్రి సుమారు 9 గంటల సమయంలో ఇంట్లో గడ్డి మందు తాగాడు. వెంటనే కుటుంబ సభ్యులు రమేష్ సహాయంతో చికిత్స నిమిత్తం కర్నూలు ఆసుపత్రికి తరలించారు.

ఆసుపత్రిలో చికిత్స పొందుతూ పరిస్థితి విషమించడంతో ఆదివారం రాత్రి 8.23 గంటల సమయంలో భరత్ మృతి చెందాడు. మృతుడి తండ్రి శివశంకర్ ఇచ్చిన ఫిర్యాదు మేరకు పోలీసులు కేసు నమోదు చేసి దర్యాప్తు చేపట్టారు.