સાવરકુંડલાના બંધ શાકમાર્કેટમાં ફટાકડાની ચિનગારીથી ભીષણ આગ, ગૌશાળાને લાખો રૂપિયાનું નુકસાન

સાવરકુંડલા શહેરમાં ગઈકાલે રાત્રે એક ભીષણ આગનો બનાવ સામે આવ્યો છે. શહેરના બંધ શાકમાર્કેટમાં રાત્રે લગભગ 11 વાગ્યાની આસપાસ અચાનક આગ ફાટી નીકળી હતી, જેના કારણે આસપાસના વિસ્તારમાં ભારે હોબાળો મચી ગયો હતો.

પ્રાથમિક માહિતી મુજબ, માર્કેટની અંદર ગૌશાળાની ગાયો માટે લાખો રૂપિયાનો ઘાસચારો રાખવામાં આવ્યો હતો. દિવાળીના ફટાકડાની ચિનગારી ઉડીને આ ઘાસચારામાં પડતા જ આગે વિકરાળ સ્વરૂપ ધારણ કર્યું હતું. જોતજોતામાં આખું માર્કેટ આગની લપેટમાં આવી ગયું હતું અને આકાશમાં ધુમાડાના ગોટેગોટા છવાઈ ગયા હતા.

આગ લાગ્યાના સમાચાર મળતા જ આસપાસના લોકોના ટોળા ઘટનાસ્થળે દોડી આવ્યા હતા. ત્યારબાદ ફાયર બ્રિગેડની ટીમ પણ તાત્કાલિક ઘટનાસ્થળે પહોંચી ગઈ હતી અને પાણીનો મારો ચલાવી ભારે જહેમત બાદ આગ પર કાબૂ મેળવ્યો હતો.

સદનસીબે આ ઘટનામાં કોઈ જાનહાનિ થઈ નથી, પરંતુ ઘાસચારો બળી જતા ગૌશાળાને મોટું નુકસાન થયું હોવાનું કહેવાઈ રહ્યું છે. હાલ આગનું ચોક્કસ કારણ અને નુકસાનનો અંદાજ જાણવા વધુ તપાસ ચાલી રહી છે. આ ઘટનાને લઈને તંત્ર દ્વારા દિવાળીના તહેવારમાં ફટાકડા ફોડતી વખતે લોકોને સાવચેતી રાખવાની અપીલ કરવામાં આવી છે.