ଦୀପାବଳିରେ ଘୋଟିଗଲା ଘନ ଅନ୍ଧକାର : ବାଣ ଫୁଟି ବାଜିଲା କାଚ, ଚାଲିଗଲା ନାବାଳକର ଜୀବନ

ରାଉରକେଲା: ଦୀପାବଳିରେ ଘୋଟିଗଲା ଘନ ଅନ୍ଧକାର । ରଘୁନାଥପାଲି ଥାନା ଅନ୍ତର୍ଗତ କୌଶଲ୍ୟା ନଗରରେ ବାଣ ଫୁଟି କାଚ ଖଣ୍ଡ ବାଜିବାରୁ ନାବାଳକର ଭାଇର ମୃତ୍ୟୁ ହୋଇଥିବାବେଳେ ଭଉଣୀ ଗୁରୁତର ଆହତ ହୋଇଛି । ତାଙ୍କୁ ରାଉରକେଲା ଆରଜିଏଚରେ ଭର୍ତ୍ତି କରାଯାଇଛି ।
ପ୍ରାଥମିକ ସୂଚନା ମୁତାବକ, ଦୀପାବଳି ପାଳନ ପାଇଁ ୧୪ ବର୍ଷୀୟ ନାବାଳକ ଚିନ୍ମୟ ଏବଂ ତାଙ୍କ ଭଉଣୀ ଟ୍ୟୁସନ୍ ସାରଙ୍କ ଘରକୁ ଯାଉଥିଲେ । ରାସ୍ତାରେ ଚାଲି ଚାଲି ଯାଉଥିବାବେଳେ କାଚ ବୋତଲରେ ଖଞ୍ଜା ଯାଇଥିବା ବାଣ ଫୁଟିଥିଲା । ଫଳରେ ଚିନ୍ମୟ ଏବଂ ତାଙ୍କ ଭଉଣୀଙ୍କ ଦେହରେ କାଚ ଖଣ୍ଡ ବାଜିଥିଲା । ଉଭୟଙ୍କୁ ଗୁରୁତର ରାଉରକେଲା ଆରଜିଏଚ୍ ମେଡ଼ିକାଲରେ ଭର୍ତ୍ତି କରାଯାଇଥିଲା । ଚିନ୍ମୟଙ୍କ ଦେହରୁ ପ୍ରବଳ ରକ୍ତସ୍ରାବ ହୋଇଥିଲା । ଶେଷରେ ସେ ଆଖି ବୁଜିଥିଲା ।
ରଘୁନାଥପାଲି ଥାନା ପୋଲିସ ଘଟଣା ସ୍ଥଳରେ ପହଁଚି ତଦନ୍ତ ଆରମ୍ଭ କରିଛି । କିଏ ଏଭଳି ବାଣ ଫୁଟାଉଥିଲେ ସେ ନେଇ ଖୋଳତାଡ଼ କରୁଛି । ସେପଟେ ଦୀପାବଳି ଭଳି ଗୋଟିଏ ଉତ୍ସବର ମୁହୂର୍ତ୍ତରେ ଏଭଳି ଅଘଟଣ ସାରା ଅଞ୍ଚଳରେ ଶୋକର ଛାୟା ଖେଳାଇ ଦେଇଛି ।