ନୃତ୍ୟ ପରିବେଷଣ କରିବା ପରେ ଓଡ଼ିଶୀ ନୃତ୍ୟଶିଳ୍ପୀଙ୍କ ମୃତ୍ୟୁ

ନୃତ୍ୟ ପରିବେଷଣ କରି ମଞ୍ଚରୁ ଓହ୍ଲାଇ ଗ୍ରୀନ୍‌ ରୁମ୍‌କୁ ଯିବା ପରେ ଅସୁସ୍ଥ ଅନୁଭବ କଲେ ଓଡ଼ିଶୀ ନୃତ୍ୟଶିଳ୍ପୀ ତଥା ଗୁରୁ ପ୍ରଶାନ୍ତ କୁମାର ସାହୁ। ସାଥୀ କଳାକାର ଓ ଆୟୋଜକମାନେ ତାଙ୍କୁ ତୁରନ୍ତ ଡାକ୍ତରଖାନା ନେଇ ଯାଇଥିଲେ। କିନ୍ତୁ ସେଠାରେ ତାଙ୍କୁ ମୃତ ଘୋଷଣା କରିଥିଲେ ଡାକ୍ତର।
ଗତକାଲି ଭୁବନେଶ୍ୱରର ଜୟଦେବ ଭବନ ପ୍ରେକ୍ଷାଳୟରେ ଜ୍ୟୋତିକଳା ପରିଷଦ ଆନୁକୂଲ୍ୟରେ ‘ବେଦ ଧ୍ୱନି ମହୋତ୍ସବ’ କାର୍ଯ୍ୟକ୍ରମ ଅବସରରେ ନୃତ୍ୟ ପରିବେଷଣ କରିଥିଲେ ପ୍ରଶାନ୍ତ କୁମାର ସାହୁ। ନୃତ୍ୟ ପରିବେଷଣ କରି ଗ୍ରୀନ ରୁମ୍‌କୁ ଫେରି ବସିଥିବା ବେଳେ ସେ ଅସୁସ୍ଥ ଅନୁଭବ କରିଥିଲେ।
ଅଳ୍ପ ବୟସରୁ ଗୁରୁ ଗଙ୍ଗାଧର ପ୍ରଧାନଙ୍କ ମାର୍ଗଦର୍ଶନରେ କୋଣାର୍କ ନାଟ୍ୟମଣ୍ଡପରୁ ନିଜର ନୃତ୍ୟ ସାଧନା ଆରମ୍ଭ କରିଥିଲେ ପ୍ରଶାନ୍ତ କୁମାର ସାହୁ । ସେ ରାଜ୍ୟ ତଥା ରାଜ୍ୟ ବାହାରେ ବହୁ ବଡ଼ ବଡ଼ ମଞ୍ଚରେ ଓଡ଼ିଶୀ ନୃତ୍ୟ ପରିବେଷଣ କରିଥିଲେ। ଗତ କିଛି ଦିନ ତଳେ ରାଷ୍ଟ୍ରପତି ଭବନରେ ସେ ଓଡ଼ିଶୀ ନୃତ୍ୟ ପରିବେଷଣ କରିଥିଲେ।