જાફરાબાદના લુણસાપુર પાસે ટ્રકે બાઈક ચાલકને હડફેટે લેતાં ૨૨ વર્ષીય યુવકનું મોત

અમરેલી જિલ્લાના જાફરાબાદ તાલુકાના લુણસાપુર નજીક બાઈક અને ટ્રક વચ્ચે ગમખ્વાર અકસ્માત સર્જાતાં ૨૨ વર્ષીય બાઈક ચાલકનું ઘટનાસ્થળે જ કરુણ મોત નીપજ્યું છે.

પ્રાપ્ત વિગત મુજબ, જાફરાબાદના લુણસાપુર ગામ નજીક કોપર કંપની પાસે બાઈક નંબર GJ-11-BD-464 અને ટ્રક નંબર 14-Z-3555 વચ્ચે જોરદાર ટક્કર થઈ હતી. દરમિયાન ટ્રકની અડફેટે આવેલા બાઈક ચાલક ભરત બાબુ શિયાળ (ઉં.વ. ૨૨) નું ગંભીર ઇજાઓના કારણે ઘટનાસ્થળે જ મોત નીપજ્યું હતું.

પૂરપાટ ઝડપે આવતા ટ્રક ચાલકની બેદરકારીને કારણે આ અકસ્માત સર્જાયો હોવાનું પ્રાથમિક તપાસમાં બહાર આવ્યું છે. આ બનાવ અંગે જાફરાબાદ પોલીસે અકસ્માતનો ગુનો નોંધી ટ્રક ચાલક સામે કાયદેસરની કાર્યવાહી હાથ ધરી છે.