સ્થાનિક વેપારીઓ અને ગ્રામજનોનો આક્રોશ: સાંતલપુર તાલુકામાં છેલ્લા ૬ મહિનાથી અધૂરું ગટરનું કામ, તહેવારના સમયે જ વેપાર ચોપટ

પાટણ જિલ્લાના સાંતલપુર તાલુકા મથકે છેલ્લા ૬ મહિનાથી ચાલતું ગટર લાઇનનું કામકાજ તંત્રની ભારે બેદરકારીના કારણે હજુ સુધી અધૂરું લટકી રહ્યું છે. વારંવાર રજૂઆતો કરવા છતાં આ સમસ્યાનો કોઈ પણ જાતનો ઉકેલ કે નિકાલ આવ્યો નથી, જેના કારણે સ્થાનિક વેપારીઓ અને ગ્રામજનોમાં ભારે રોષ વ્યાપી ગયો છે.
​આગામી દિવસોમાં દીવાળી જેવા મોટો તહેવાર નજીક આવી રહ્યો છે, ત્યારે જ મુખ્ય બજાર અને રસ્તાઓ પર ખોદકામ અને ગટરના કામના લીધે ધૂળ અને ગંદકીના સામ્રાજ્ય વચ્ચે વેપારીઓને ભારે નુકસાન વેઠવાનો વારો આવ્યો છે. ગ્રાહકો દુકાનો સુધી પહોંચી શકતા ન હોવાથી તહેવારની મુખ્ય સીઝનમાં જ વેપાર સંપૂર્ણપણે ઠપ થઈ ગયો છે.
​સ્થાનિક દુકાનદારોના જણાવ્યા મુજબ:
​સીઝનનો વેપાર ચોપટ: દીવાળીની ખરીદીની સીઝનમાં રોડ રસ્તા બંધ હોવાથી અને ગટરના કારણે થતી હાલાકીને લીધે ગ્રાહકો આવતા નથી, જેથી વેપારીઓને આર્થિક રીતે મોટો ફટકો પડ્યો છે.
​રોગચાળાનો ભય: ખુલ્લી ગટરો અને અડધા મુકેલા કામથી દુર્ગંધ તેમજ મચ્છરોનો ઉપદ્રવ વધ્યો છે, જેનાથી તહેવારોના સમયે જ રોગચાળો ફેલાવાનો ભય ઊભો થયો છે.
​તંત્રનું ઉદાસીન વલણ: ૬-૬ મહિના વિતવા છતાં પણ સંબંધિત કોન્ટ્રાક્ટર કે તંત્ર દ્વારા આ કામ ઝડપથી પૂરું કરવામાં આવતું નથી.
​સ્થાનિક વેપારી મંડળ અને ગ્રામજનોની માગણી છે કે દીવાળીના તહેવાર પહેલા જ આ ગટરનું કામકાજ યુદ્ધના ધોરણે પૂરું કરવામાં આવે અથવા કામચલાઉ યોગ્ય રસ્તો કરી આપવામાં આવે. જો વહેલી તકે આ સમસ્યાનો ઉકેલ નહીં લાવવામાં આવે તો આગામી દિવસોમાં ગાંધી ચિંધ્યા માર્ગે આંદોલન કરવાની ચીમકી વેપારીઓ દ્વારા આપવામાં આવી છે.