અરવલ્લીના મેઘરજમાં સરકારી દુકાનમાં અનાજની ઘટનો મામલો, યુરિયા ખાતરથી છુપાવવાના આક્ષેપો

અરવલ્લી જિલ્લાના મેઘરજ તાલુકાના નારણપુર ગામમાં સરકારી સસ્તા અનાજની દુકાનમાં જથ્થાની ઘટનો મામલો સામે આવ્યો છે. નારણપુર સેવા સહકારી મંડળી દ્વારા સંચાલિત દુકાનમાં ઘઉં, ચોખા અને ખાંડના જથ્થામાં મોટી ઘટ નોંધાઈ હોવાનું જણાવાયું છે.

પ્રાથમિક તપાસની વિગતો મુજબ, ઘઉંમાં 3,716 કિલોગ્રામ, ચોખામાં 2,883 કિલોગ્રામ અને ખાંડમાં 695 કિલોગ્રામ જેટલી ઘટ નોંધાઈ છે. આ ઉપરાંત, જથ્થાની ઘટ છુપાવવા માટે ઘઉંનાં બારદાનમાં યુરિયા ખાતર તેમજ ચણા અને તુવેરની દાળ ભરવામાં આવી હોવાના ગંભીર આક્ષેપો પણ થયા છે.

આ મામલે ખાતરના 47 કટ્ટા અંગે ખેતીવાડી વિભાગને રિપોર્ટ કરાયો હોવાનું જણાવાયું છે. મેઘરજ પુરવઠા વિભાગે તપાસ બાદ અહેવાલ જિલ્લા પુરવઠા વિભાગને સોંપ્યો છે. હવે તપાસમાં શું બહાર આવે છે અને જવાબદારો સામે શું કાર્યવાહી થાય છે તેના પર સૌની નજર છે.