ଆନ୍ତଃରାଜ୍ୟ କୁଖ୍ୟାତ ଅପରାଧୀକୁ ଏନକାଉଣ୍ଟର, ବିଭିନ୍ନ ରାଜ୍ୟରେ ରହିଛି ୪୦ରୁ ଅଧିକ ମାମଲା

କେନ୍ଦୁଝର: ପୁଣି କେନ୍ଦୁଝର ପୋଲିସ ବଡ଼ ଏନକାଉଣ୍ଟର କରିଛି । ନନ୍ଦିପଦା ପୋଲିସ ଏନକାଉଣ୍ଟରେ ଆନ୍ତଃରାଜ୍ୟ କୁଖ୍ୟାତ ଅପରାଧୀ ଅର୍ଜୁନ ପ୍ରଧାନ ଆହତ ହୋଇଛି । ତାକୁ କଟକ ଏସସିବି ମେଡ଼ିକାଲକୁ ସ୍ଥାନାନ୍ତର କରାଯାଇଛି ।
ସୂଚନା ଅନୁଯାୟୀ ଚଳିତ ବର୍ଷ ସେପ୍ଟେମ୍ବର ମାସ ୨୭ ତାରିଖ ରେ ସୋସୋ ଥାନା ବନ୍ତଳା ଗାଁରେ ଜଣେ ସୁନା ବ୍ୟବସାୟୀଙ୍କ ଠାରୁ ବନ୍ଧୁକ ମୁନରେ ଲୁଟ୍ କରାଯାଇଥିଲା । ସମ୍ପୃକ୍ତ ଘଟଣାରେ ମୁଖ୍ୟ ଆସାମୀ ଥିଲା ଅର୍ଜୁନ ପ୍ରଧାନ। ଅର୍ଜୁନକୁ ଧରିବାକୁ ପୋଲିସ ସେବେଠାରୁ ଚେଷ୍ଟା କରୁଥିଲା । ଆଜି ଭୋର ସମୟରେ ଅର୍ଜୁନ ଛେନାପଦୀ ନିକଟ ଅସିଆ ଗ୍ରାମ ପାଖାପାଖି ଥିବା ପୋଲିସ ସୂଚନା ପାଇ ଚଢ଼ଉ କରିଥିଲା । ଏହି ସମୟରେ ସେ ପୋଲିସ ଉପରକୁ ଗୁଳି କରି ଖସି ପଳାଇ ଯିବାକୁ ଉଦ୍ୟମ କରୁଥିବାବେଳେ ପୋଲିସ ପାଲଟା ଜବାବ ଦେଇଥିଲା । ପୋଲିସର ଜବାବୀ ଗୁଳିରେ ଅର୍ଜୁନ ଆଣ୍ଠେଇ ପଡ଼ିଥିଲା । ତାର ଡାହାଣ ଗୋଡ଼ରେ ଗୁଳି ବାଜିଛି ।
ଅଜୁର୍ନ ପ୍ରଧାନ ଯାଜପୁର ଜିଲ୍ଲାର ଯଖପୁରା ଥାନା ଦଶମାଣିଆ ଗାଁର ବାସିନ୍ଦା । ତା ନାଁରେ ଓଡ଼ିଶା, ବିହାର ଓ ଝାଡ଼ଖଣ୍ଡରେ ପ୍ରାୟ ୪୦ରୁ ଅଧିକ ମାମଲା ରହିଛି ।