અજાબ-શેરગઢના નાગલ ધામ ખાતે મહિયા ક્ષત્રિય સમાજ દ્વારા દશેરાની ભવ્ય ઉજવણી, શસ્ત્રપૂજન સાથે હોમ-હવન..

દશેરાના પાવન પર્વ નિમિત્તે મહિયા ક્ષત્રિય સમાજ દ્વારા અજાબ-શેરગઢ મુકામે આવેલા નાગલ ધામ ખાતે પરંપરાગત ધાર્મિક કાર્યક્રમનું આયોજન કરવામાં આવ્યું હતું. આ પ્રસંગે માં નાગબાઈ માતાજીના પવિત્ર સાનિધ્યમાં વિધિવત્ હોમ-હવન સાથે શસ્ત્રપૂજન કરવામાં આવ્યું હતું. સમગ્ર કાર્યક્રમ દરમિયાન ધાર્મિક આસ્થા, ભક્તિભાવ અને મહિયા ક્ષત્રિય સમાજની ગૌરવશાળી પરંપરાની ઝાંખી જોવા મળી હતી..

દશેરા પર્વને ભારતીય સંસ્કૃતિમાં અધર્મ પર ધર્મના વિજય અને અસત્ય પર સત્યના વિજયના પ્રતીક તરીકે ઉજવવામાં આવે છે. ક્ષત્રિય પરંપરામાં શસ્ત્રપૂજનનું વિશેષ મહત્ત્વ રહેલું છે. આ પવિત્ર અવસરે માં નાગબાઈ માતાજીના આશીર્વાદ સાથે હોમ-હવન અને શસ્ત્રપૂજન કરીને સમાજની પરંપરા,સંસ્કાર અને ધાર્મિક આસ્થાને ઉજાગર કરવામાં આવી હતી.આ ધાર્મિક કાર્યક્રમમાં મહિયા ક્ષત્રિય સમાજના વિવિધ આગેવાનો, પ્રમુખશ્રીઓ તેમજ માતાઓ અને બહેનોએ ઉત્સાહભેર ભાગ લીધો હતો. સૌએ સાથે મળીને દશેરાના પાવન પર્વની ઉજવણી કરી હતી અને સમાજની એકતા, અખંડિતતા તથા પરંપરાના જતનનો સંદેશ આપ્યો હતો.આ કાર્યક્રમ ધાર્મિક શ્રદ્ધા, ક્ષત્રિય પરંપરા અને સંસ્કૃતિના સંગમ સમાન રહ્યો હતો.