ભુજના રામનગરી વિસ્તારમાં પ્રોવિઝન સ્ટોરની આડમાં વિદેશી દારૂનું વેચાણ ઝડપાયું, રૂ.૨૭,૪૭૧નો મુદ્દામાલ જપ્ત

ભુજ શહેર બી ડિવિઝન પોલીસ દ્વારા રામનગરી વિસ્તારમાં પ્રોવિઝન સ્ટોરની આડમાં ભારતીય બનાવટના વિદેશી દારૂનું વેચાણ કરતાં એક ઈસમને ઝડપી પાડવામાં આવ્યો છે. પોલીસે આરોપી પાસેથી વિદેશી દારૂ અને બીયરની વિવિધ બ્રાન્ડની બોટલો તેમજ એક મોબાઈલ ફોન સહિત કુલ રૂ.૨૭,૪૭૧નો મુદ્દામાલ કબજે કર્યો છે.

આ કાર્યવાહી દરમિયાન જસવંત શંકરભાઈ ચૌધરી (ઉં.વ.૨૬), રહે. સનરાઈઝ સોસાયટી, નવાવાસ, માધાપર તા. ભુજ, મૂળ રહે. વારાહી તા. સાંતલપુર, જી. પાટણને પકડી પાડવામાં આવ્યો હતો. પોલીસે સ્થળ પરથી કિંગફિશર રીગલ સ્ટ્રોંગ બીયરની ૩૮ બોટલ, ચિત્તા એક્સ્ટ્રા સ્ટ્રોંગ બીયરની ૮ બોટલ, ૮ પીએમ સ્પેશિયલ રેર વ્હિસ્કીની ૮ બોટલ, રોયલ ચેલેન્જ ફાઇન રિઝર્વ વ્હિસ્કીની ૮ બોટલ, પાર્ટી સ્પેશિયલ વ્હિસ્કીની ૨૦ બોટલ અને રોયલ સ્ટેગ વ્હિસ્કીની ૩૪ બોટલ મળી આવી હતી. આ ઉપરાંત રૂ.૫,૦૦૦ની કિંમતનો એક મોબાઈલ ફોન પણ કબજે કરવામાં આવ્યો હતો.

નોંધનીય છે કે જપ્ત કરાયેલી દારૂની બોટલો પર રાજસ્થાન, નવી દિલ્હી, પંજાબ અને ચંડીગઢમાં વેચાણ માટેનાં લેબલ દર્શાવવામાં આવ્યાં હતાં. આ મામલે ભુજ શહેર બી ડિવિઝન પોલીસે આગળની કાયદેસરની કાર્યવાહી હાથ ધરી છે.