સુરતના મહિધરપુરામાં નવરાત્રિના આઠમે જીવંત બની વર્ષો જૂની કોરડા ખાવાની પરંપરા

સુરત શહેરના મહિધરપુરા જદાખાડી વિસ્તારમાં નવરાત્રિના આઠમના દિવસે વર્ષો જૂની કોરડા ખાવાની પરંપરા ફરીથી જીવંત બની છે. આ સંસ્કૃતિક કાર્યક્રમ 'શ્રી મહાકાળી માતાજી' મંદિર નજીક 'શ્રી સુરતી કંસારા શુભેચ્છક મંડળ' દ્વારા આયોજિત કરવામાં આવ્યો હતો.

નવરાત્રિ દરમિયાન આઠમ નિમિત્તે સવારથી જ માતાજીને કેસર સ્નાન કરાવી વિધિવત પૂજા કરવામાં આવી હતી. માતા મહાકાળીને સુંદર વાઘા પહેરાવવામાં આવ્યા હતા અને સાંજે આરતી સાથે નવખંડનો થાળ ધરાવવામાં આવ્યો હતો. આ આધ્યાત્મિક વાતાવરણમાં સમાજના સભ્યોએ પરંપરાગત રીતે ઉજવણી કરી.

આ વિશિષ્ટ પરંપરામાં સમાજનો એક સભ્ય બીજા સભ્યને માનતા પૂરી કરવા માટે કોરડા મારે છે, જે સમાજમાં ભાઈચારા અને એકતાનું પ્રતીક છે. સાથે જ નાના-મોટા દીવડાંની ઉછામણી પણ કરવામાં આવી હતી.

સ્વેચ્છાએ સમાજના સભ્યોએ પોતાના પરિવાર તરફથી દિવડાંની ઉછામણી થાય તે માટે બોલી લગાવી હતી. આ કાર્યક્રમમાં સમાજના સભ્યોએ સક્રિયતાથી ભાગ લીધો હતો અને આ પરંપરાને જીવંત રાખવામાં મહત્વની ભૂમિકા ભજવી હતી.