હિંમતનગર સિવિલ માર્ગ પર બિલ્ડરો દ્વારા રસ્તો બંધ: દર્દીઓ અને એમ્બ્યુલન્સની અવર-જવર ખોરવાઈ

હિંમતનગરની સિવિલ હોસ્પિટલ ખાતે મોટી સંખ્યામાં દર્દીઓ સારવાર માટે આવતા હોય છે અને અનેક એમ્બ્યુલન્સની સતત અવર-જવર રહેતી હોય છે. આવા વ્યસ્ત માર્ગ પર કેટલાક બિલ્ડરો દ્વારા ગેરકાયદેસર રીતે બેરિયર મૂકીને રસ્તાનો અડધો ભાગ બંધ કરી દેવામાં આવ્યો છે.

આ ગેરકાયદેસર દબાણને કારણે દર્દીઓ, તેમના સગા-સંબંધીઓ અને હોસ્પિટલમાં આવતા-જતા વાહનચાલકોને ભારે હાલાકીનો સામનો કરવો પડી રહ્યો છે. ખાસ કરીને એમ્બ્યુલન્સને દર્દીઓને સમયસર હોસ્પિટલ પહોંચાડવામાં પણ વિલંબ થઈ શકે છે, જે ગંભીર પરિસ્થિતિનું નિર્માણ કરી શકે છે.

સ્થાનિક તંત્ર દ્વારા આ બાબતે તાત્કાલિક ધ્યાન આપીને રસ્તા પરથી દબાણ દૂર કરવામાં આવે અને ટ્રાફિકની સમસ્યા હલ કરવામાં આવે તેવી માંગણી સ્થાનિક નાગરિકો દ્વારા કરવામાં આવી રહી છે. સિવિલ માર્ગ પર દર્દીઓની સુવિધાને ધ્યાનમાં રાખીને ખુલ્લો રાખવો અત્યંત આવશ્યક છે.