સુરતમાં કાશીનગર સોસાયટીમાં પરંપરાગત માઁ અંબાજીના ગરબાનું ભવ્ય આયોજન

સુરતના ઉધના વિસ્તારમાં આવેલી કાશીનગર સોસાયટીમાં નવરાત્રી પર્વ નિમિત્તે માઁ અંબાજીના ગરબાનું ભવ્ય આયોજન કરવામાં આવ્યું હતું. શ્રી માધવ ગૌશાળા અને Triple K ગ્રુપ દ્વારા છેલ્લા 34 વર્ષથી આ પરંપરાગત ગરબાનું આયોજન કરવામાં આવે છે, જે આ વર્ષે પણ ખૂબ જ ઉત્સાહભેર સંપન્ન થયું.

આયોજક કૃણાલ સુર્યવંશીએ જણાવ્યું હતું કે, નવરાત્રીના છઠ્ઠા નોરતે દેવી અંબાજીનો ભવ્ય શ્રૃંગાર કરવામાં આવ્યો હતો. માતાજીના સુંદર સ્વરૂપના દર્શન કરવા માટે મોટી સંખ્યામાં ભક્તો ઉમટી પડ્યા હતા અને ગરબાના તાલે ઝૂમી ઉઠ્યા હતા. ભક્તોની શ્રદ્ધા કાશીનગરમાં સ્થાપિત માઁ દેવીની પ્રતિમા સાથે ઊંડાણપૂર્વક જોડાયેલી છે.

દેવી શક્તિના આ પર્વમાં અનેક ભક્તો માતાજીની ભવ્ય પ્રતિમાના દર્શન કરવા માટે આવે છે. ગરબાની સમગ્ર વ્યવસ્થા શ્રી માધવ ગૌશાળાના ગૌસેવકો અને Triple K ગ્રુપના યુવાનો દ્વારા કરવામાં આવી હતી, જેમણે ઉત્સવને સફળ બનાવવા માટે અથાગ પ્રયાસો કર્યા હતા.