ભીમાસરમાં સ્ટેટ મોનીટરીંગ સેલનો દારૂના જંગી જથ્થા પર દરોડો: એક ઝડપાયો, ત્રણ વોન્ટેડ

પૂર્વ કચ્છના રાપર તાલુકાના ભીમાસર ગામે સ્ટેટ મોનીટરીંગ સેલે બાતમીના આધારે દરોડો પાડી ભારતીય બનાવટના વિદેશી દારૂ અને બીયરની ૬૦૪ પેટીઓ, જેમાં કુલ ૨૩,૭૨૯ બોટલોનો સમાવેશ થાય છે, તે જપ્ત કરી છે. આ દારૂના જથ્થાની કિંમત આશરે ૬૨.૯૫ લાખ રૂપિયા આંકવામાં આવી છે.

આ કાર્યવાહી દરમિયાન, સ્ટેટ મોનીટરીંગ સેલે મોબાઇલ અને રોકડ સહિત કુલ ૬૩,૦૮,૭૬૧ રૂપિયાનો મુદ્દામાલ કબજે કર્યો છે. આ દારૂના મોટા જથ્થાના કેસમાં રામદેવસિંહ દિલુભા વાઘેલા નામની વ્યક્તિની ધરપકડ કરવામાં આવી છે.

પોલીસ સૂત્રોના જણાવ્યા અનુસાર, આ ગુનામાં હરદેવસિંહ દિલુભા વાઘેલા સહિત કુલ ત્રણ આરોપીઓને વોન્ટેડ જાહેર કરવામાં આવ્યા છે. આ મામલે આડેસર પોલીસ સ્ટેશનમાં પ્રોહિબિશન એક્ટની સંબંધિત કલમો હેઠળ ગુનો નોંધી કાયદેસરની કાર્યવાહી હાથ ધરવામાં આવી છે.