અમદાવાદથી 'લુટેરી દુલ્હન ગેંગ'નો બે માસથી નાસતો આરોપી રાપર પોલીસ દ્વારા ઝડપાયો

કચ્છના રાપર પોલીસ સ્ટેશનમાં નોંધાયેલા 'લુટેરી દુલ્હન ગેંગ'ના ગુનામાં છેલ્લા બે માસથી નાસતા ફરતા આરોપીને રાપર પોલીસે અમદાવાદમાંથી સફળતાપૂર્વક ઝડપી પાડ્યો છે. ટેકનિકલ એનાલિસિસ અને હ્યુમન સોર્સની મદદથી પોલીસે આરોપીને ઝડપી પાડી તેની વિરુદ્ધ કાયદેસરની કાર્યવાહી હાથ ધરી છે.

પોલીસની મળતી માહિતી મુજબ, રાજ્યના પોલીસ મહાનિર્દેશક, સરહદી રેન્જ ભુજના પોલીસ મહાનિરીક્ષક શ્રી ચિરાગ કોરડિયા, પૂર્વ કચ્છ-ગાંધીધામના પોલીસ અધિક્ષક શ્રી સાગર બાગમાર તથા ભચાઉ વિભાગના નાયબ પોલીસ અધિક્ષક શ્રી સાગર સાંબડાના માર્ગદર્શન હેઠળ નાસતા ફરતા આરોપીઓને ઝડપી પાડવા સૂચના આપવામાં આવી હતી. આ દરમિયાન રાપર પોલીસ સ્ટેશનમાં તા. 11 ઓગસ્ટ, 2026ના રોજ ભારતીય ન્યાય સંહિતાની કલમ 316(2), 318(4) અને 61(2) મુજબ ગુનો નોંધાયો હતો.

આ ગુનાના નાસતા ફરતા આરોપીઓને પકડી પાડવા રાપર પોલીસ સ્ટેશનના પોલીસ ઇન્સ્પેક્ટર આર.એલ. ખટાણાએ એક્શન પ્લાન તૈયાર કરી ટેકનિકલ એનાલિસિસ અને હ્યુમન સોર્સના આધારે તપાસ હાથ ધરી હતી. તપાસ દરમિયાન 'લુટેરી દુલ્હન ગેંગ'ના ગુનામાં સંડોવાયેલા આરોપી મનોજ ઉર્ફે મધરમ જયંતિભાઈ ચુનારા (દેવીપૂજક), ઉંમર 39 વર્ષ, રહે. ચુનારા વાસ, વટવા, અમદાવાદને અમદાવાદમાંથી ઝડપી પાડવામાં આવ્યો હતો.

ઝડપાયેલા આરોપી મનોજ ઉર્ફે મધરમ જયંતિભાઈ ચુનારા, ઉંમર 39 વર્ષ, મૂળ વટવા, અમદાવાદનો રહેવાસી છે. રાપર પોલીસ સ્ટેશનમાં ગુ.ર.નં. 11993010260432/2026 હેઠળ ભારતીય ન્યાય સંહિતાની કલમ 316(2), 318(4) અને 61(2) મુજબ ગુનો નોંધાયેલો છે. આ કામગીરી રાપર પોલીસ સ્ટેશનના પોલીસ ઇન્સ્પેક્ટર આર.એલ. ખટાણા, પોલીસ સબ-ઇન્સ્પેક્ટર એચ.વી. કાતરિયા તથા પોલીસ સ્ટેશનના સ્ટાફ દ્વારા કરવામાં આવી હતી. રાપર પોલીસ દ્વારા આરોપીને ઝડપી પાડી આગળની કાયદેસરની કાર્યવાહી હાથ ધરવામાં આવી છે.