જામનગરમાં પોક્સો અને હત્યા કેસના આરોપી નિતિન ડોસાજી માણેકને ફાંસીની સજા

જામનગર જિલ્લાના સિક્કા પોલીસ સ્ટેશનમાં નોંધાયેલા પોક્સો અને હત્યાના ગંભીર ગુનામાં સ્પેશિયલ પોક્સો કોર્ટે આરોપી નિતિન ડોસાજી માણેક (ઉંમર 39 વર્ષ) ને ફાંસીની સજા ફટકારી છે. આ ચુકાદાથી ગુનાખોરી સામે કડક કાર્યવાહીનો સંદેશ આપવામાં આવ્યો છે.

મળતી માહિતી મુજબ, ભોગ બનનાર મહિલા આરોપી નિતિન ડોસાજી માણેકની ભાણી હતી અને તેના ઘરે જ રહેતી હતી. આ દુખદ ઘટનામાં આરોપીએ તેની ભાણી સાથે પોક્સો હેઠળ આવતી કૃત્ય કર્યા બાદ તેની હત્યા કરી હતી.

આ કેસમાં કુલ 23 સાક્ષીઓની જુબાની લેવામાં આવી હતી અને 95 જેટલા દસ્તાવેજી પુરાવા કોર્ટ સમક્ષ રજૂ કરવામાં આવ્યા હતા. કોર્ટે તમામ પુરાવા અને જુબાનીઓને ધ્યાનમાં લીધા બાદ આરોપીને દોષિત ઠેરવી મૃત્યુદંડની સજાનો ચુકાદો આપ્યો છે. આ ચુકાદો ન્યાયતંત્રની સક્રિયતા અને પીડિતોને ન્યાય અપાવવાની પ્રતિબદ્ધતા દર્શાવે છે.