અમદાવાદ: ફેસબુક હનીટ્રેપ કેસમાં વૃદ્ધ પાસેથી ૨૪ લાખ પડાવનાર ગેંગનો પર્દાફાશ, એક આરોપી ઝડપાયો

અમદાવાદ શહેર LCB Zone-7 દ્વારા ફેસબુક પર હનીટ્રેપના ગુનામાં સંડોવાયેલી એક ગેંગનો પર્દાફાશ કરવામાં આવ્યો છે. આ ગેંગ સોશિયલ મીડિયા પર યુવતીઓ મારફતે સંપર્ક કરી, બાદમાં પોલીસ તરીકે ખોટી ઓળખ આપી ખોટા કેસમાં ફસાવવાની ધમકી આપી વૃદ્ધ પાસેથી ૨૪ લાખ રૂપિયાની ખંડણી વસૂલતી હતી. LCB Zone-7 એ આ ગુનામાં એક આરોપીને ઝડપી પાડ્યો છે.

પોલીસ સૂત્રો પાસેથી મળતી માહિતી મુજબ, આરોપી પાસેથી રોકડા રૂ. ૧ લાખ અને અન્ય મુદ્દામાલ મળી કુલ રૂ. ૧.૦૫ લાખનો મુદ્દામાલ કબજે કરવામાં આવ્યો છે. પોલીસે આ ગેંગના અન્ય સભ્યોને ઝડપી પાડવા માટે શોધખોળ હાથ ધરી છે. આ પ્રકારના ગુનાઓ શહેરમાં વધી રહ્યા છે ત્યારે પોલીસ દ્વારા જનજાગૃતિ અભિયાન પણ ચલાવવામાં આવી રહ્યું છે.

પોલીસે નાગરિકોને અપીલ કરી છે કે તેઓ સોશિયલ મીડિયા પર અજાણ્યા લોકો સાથે સંપર્ક કરતી વખતે સાવચેતી રાખે. જો કોઈ વ્યક્તિ બ્લેકમેઇલિંગ અથવા ખંડણીની ધમકી આપે તો તાત્કાલિક નજીકના પોલીસ સ્ટેશન અથવા LCB નો સંપર્ક કરવો જોઈએ.