દિલ્હી-મુંબઈ એક્સપ્રેસ-વે પર બે ટેમ્પો વચ્ચે ગમખ્વાર અકસ્માત, એક ટેમ્પો પલટી માર્યો

ભરૂચના કારેલા ગામ નજીક દિલ્હી-મુંબઈ એક્સપ્રેસ-વે પર આજે સવારે બે ટેમ્પો વચ્ચે એક ગંભીર અકસ્માત સર્જાયો હતો. આ અકસ્માતમાં એક ટેમ્પો રસ્તા પર પલટી ખાઈ ગયો હતો, જ્યારે બીજો ટેમ્પો રેલિંગ તોડીને રોડની બહાર નીકળી ગયો હતો. અકસ્માત એટલો ભયાનક હતો કે ટેમ્પોમાં ભરેલો માલસામાન રસ્તા પર વેરવિખેર થઈ ગયો હતો.

પ્રાથમિક માહિતી અનુસાર, આ અકસ્માતનું કારણ ચાલકને ઝોકું આવવું હોવાનું મનાય છે. જોકે, આ અંગે વધુ તપાસ હાથ ધરવામાં આવી રહી છે. અકસ્માત બાદ રસ્તા પર વાહનવ્યવહાર થોડા સમય માટે ખોરવાયો હતો.

સદનસીબે, આ દુર્ઘટનામાં બંને ટેમ્પોના ચાલકોનો ચમત્કારિક રીતે બચાવ થયો હતો. તેમને સામાન્ય ઈજાઓ પહોંચી હોવાનું જાણવા મળ્યું છે. ઘટનાની જાણ થતાં જ પોલીસ ઘટનાસ્થળે પહોંચી ગઈ હતી અને પરિસ્થિતિનો તાગ મેળવી કાયદેસરની કાર્યવાહી હાથ ધરી હતી.