ଉମରକୋଟରେ ଦୁଇ ଅଣଛାତ୍ରଙ୍କ ମଧ୍ୟରେ ଗଣ୍ଡଗୋଳ; ପରେ ଛୁରା ମାଡ଼

ଉମରକୋଟରେ କଲେଜ ନିର୍ବାଚନ ପୂର୍ବରୁ ତେଜିଲା ହିଂସା । ପ୍ରଥମେ ଦୁଇ ଅଣ ଛାତ୍ରଗୋଷ୍ଠୀ ମଧ୍ୟରେ ଗଣ୍ଡଗୋଳ ହୋଇଥିଲା । ପରେ ଏହି ଗଣ୍ଡଗୋଳ ଉଗ୍ରରୂପ ନେଇଥିଲା । ଆଉ ଜଣେ ଅଣ ଛାତ୍ର ଦୀପ କମଲ ମହାପାତ୍ରଙ୍କ ଉପରେ ଛୁରାମାଡ଼ ହୋଇଥିଲା । ଆହତ ଦୀପ କମଲ ମହାପାତ୍ରଙ୍କୁ ପ୍ରଥମେ ଉମରକୋଟ ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ପରେ ସ୍ୱାସ୍ଥ୍ୟ ଅବସ୍ଥା ଗୁରୁତର ହେବାରୁ ପଡୋଶୀ ରାଜ୍ୟ ବିଶାଖାପାଟଣା ତାଙ୍କୁ ସ୍ଥାନାନ୍ତର କରାଯାଇଛି ।
କଲେଜ ନିର୍ବାଚନ ଚାଲିଥିବା ସମୟରେ କଲେଜ କ୍ୟାମ୍ପସ ବାହାରେ ଗତକାଲି କିଛି ଦୁଇ ଗୋଷ୍ଠୀର ଅଣଛାତ୍ରଙ୍କ ମଧ୍ୟରେ କୌଣସି କାରଣକୁ ନେଇ ବଚସା ହୋଇଥିଲା । ପରେ ଘଟଣାଟି ସାମୟିକ ଭାବେ ଶାନ୍ତ ହୋଇପଡ଼ିଥିଲା । କିନ୍ତୁ ଆଜି ସକାଳେ ପୁଣି ଏହାକୁ ନେଇ ଉତ୍ତେଜନା ଦେଖାଦେଇଥିଲା ।
ଅଭିଯୋଗ ଅନୁସାରେ, ଅଭିଷେକ ପଣ୍ଡା ନାମକ ଯୁବକଙ୍କୁ ଅନ୍ୟ ଗୋଷ୍ଠୀର କିଛି ଯୁବକ ଡିଏନକେ ଠାରେ ଆକ୍ରମଣ କରିଥିଲେ । ଏହାକୁ ନେଇ ଦୀପକମଲ ମହାପାତ୍ରଙ୍କ ଗୋଷ୍ଠୀ ପକ୍ଷରୁ ଡିଏନକେ ସ୍ଥିତ ତ୍ରିନାଥ ମନ୍ଦିର ନିକଟରେ ଆଲୋଚନା ଚାଲିଥିଲା । ଏହି ସମୟରେ ପ୍ରାୟ ୩୦ ରୁ ୪୦ ଜଣ ଯୁବକ ଆସି ସେମାନଙ୍କ ଉପରକୁ ଅତର୍କିତ ଆକ୍ରମଣ କରିଥିଲେ ।ଏହି ଆକ୍ରମଣରେ ଦୀପକମଲ ମହାପାତ୍ରଙ୍କୁ ଛୁରା ଓ ଭୁଜାଲିରେ ଆକ୍ରମଣ କରାଯାଇଥିବାର ପ୍ରତ୍ୟକ୍ଷଦର୍ଶୀମାନେ କହିଛନ୍ତି । ତାଙ୍କ ପେଟ ଓ ହାତ ଓ ଗୋଡ଼ରେ ଆଘାତ ଲାଗିଥିବା ଜଣାପଡ଼ିଛି । ଗୁରୁତର ଆହତ ଅବସ୍ଥାରେ ଦୀପକମଲ ଙ୍କ ଉମରକୋଟ ଉପଖଣ୍ଡ ଚିକିତ୍ସାଳୟକୁ ନିଆଯାଇଥିଲା । ଘଟଣା ପରେ ସହରରେ ତୀବ୍ର ଉତ୍ତେଜନା ଲାଗିରହିଛି । ଆହତ ଦୀପକମଲ ମହାପାତ୍ରଙ୍କୁ ମେଡିକାଲରେ ଚିକିତ୍ସା କରାଯାଉଥିବା ବେଳେ ସେଠାରେ ମଧ୍ୟ ଉତ୍ତେଜନାପୂର୍ଣ୍ଣ ପରିସ୍ଥିତି ରହିଛି ।
ଘଟଣାକୁ ନେଇ ଉମରକୋଟ ଥାନାରେ ଅଭିଯୋଗ ଦାଖଲ ହୋଇଥିବା ବେଳେ ପୁଲିସ ଘଟଣାର ତଦନ୍ତ କରୁଛି । ଆକ୍ରମଣର ପ୍ରକୃତ କାରଣ କଣ ଏବଂ ଏଥିରେ କେଉଁମାନେ ସମ୍ପୃକ୍ତ, ତାହା ପୁଲିସ ତଦନ୍ତ ପରେ ସ୍ପଷ୍ଟ ହେବ ।