અમરેલી: દેશી દારૂના વેચાણથી કંટાળી મહિલાઓ રણચંડી બની, દારૂની પોટલીઓનો નાશ કર્યો

અમરેલી જિલ્લાના કુંકાવાવ-વડિયા તાલુકાના નાજાપુર ગામે દેશી દારૂના ખુલ્લેઆમ વેચાણથી કંટાળી મહિલાઓ રણચંડી બની છે. ગામમાં છેલ્લા ઘણા સમયથી દેશી દારૂનું વેચાણ થતું હોવાથી અનેક પરિવારોમાં કંકાસ અને આર્થિક તકલીફો ઉભી થઈ હતી.

અનેક વખત રજૂઆત કરવા છતાં કાર્યવાહી ન થતા આજે બપોરે ગામની 20 થી 25 જેટલી મહિલાઓ એકઠી થઈ હતી અને દેશી દારૂ વેચાતા સ્થળે જનતા રેડ કરી હતી. મહિલાઓએ સ્થળ પરથી દેશી દારૂની પોટલીઓ કબ્જે કરી તેનો નાશ કર્યો હતો.

ગામના આગેવાનોએ જણાવ્યું હતું કે, દારૂના કારણે યુવાનો બરબાદ થઈ રહ્યા છે. પોલીસ તંત્ર દ્વારા કાયમી ધોરણે આવા અડ્ડા બંધ કરાવવામાં આવે તેવી માંગ ઉઠી છે. આ ઘટનાનો વિડીયો હાલ સોશિયલ મીડિયામાં વાયરલ થયો છે. વડિયા પોલીસ દ્વારા આ મામલે તપાસ હાથ ધરવામાં આવી હોવાનું જાણવા મળે છે.