સુરતમાં વનિતા વિશ્રામ આર્ટ ગેલેરીમાં 'મહેંદીકૃત રામાયણ' પ્રદર્શન યોજાયું

સુરતની જાણીતી વનિતા વિશ્રામ આર્ટ ગેલેરી ખાતે તાજેતરમાં એક અનોખા ‘મહેંદીકૃત એક્ઝિબિશન’નું આયોજન કરવામાં આવ્યું હતું. મહેંદીકલ્ચરના સહ-સ્થાપક નિમિષા પારેખ દ્વારા આયોજિત આ એકદિવસીય પ્રદર્શન કલાપ્રેમીઓ માટે વિશેષ આકર્ષણનું કેન્દ્ર બન્યું હતું.

આ પ્રદર્શનનું સૌથી મોટું આકર્ષણ 'મહેંદીકૃત રામાયણ' રહ્યું હતું. નિમિષા પારેખે ભારતીય સંસ્કૃતિ અને લોકકલાનો અદભુત સમન્વય સાધીને રામાયણના 51 પાવન પ્રસંગોને વારલી ચિત્રકલાના માધ્યમથી મહેંદી દ્વારા કેન્વાસ પર કંડાર્યા છે.

આ કલાકૃતિઓને પુસ્તક સ્વરૂપે પણ પ્રકાશિત કરવામાં આવી છે, જે ભારતીય કલા અને ધાર્મિક ગ્રંથોના સંગમનું ઉત્તમ ઉદાહરણ પૂરું પાડે છે.