సిరిసిల్ల యువకుడు దేవరాజు, తన మూలాలైన రైతాంగ పోరాటాల అన్వేషణ

రాజన్న సిరిసిల్ల జిల్లా, కోనరావుపేట మండలం, నిమ్మపల్లి గ్రామానికి చెందిన దేవరాజు, తన మూలాలను మరువని యువకుడిగా గుర్తింపు పొందుతున్నాడు. సిరిసిల్ల నుంచి హైదరాబాద్‌కు వలస వెళ్లిన కుటుంబాల్లో దేవరాజు కుటుంబం కూడా ఒకటి. తన ప్రాంతంలో జరిగిన అనేక పోరాటాల గురించి తెలుసుకున్నప్పుడు దేవరాజుకు గర్వంగా అనిపించేది. ముఖ్యంగా రైతాంగ పోరాటాలు ఎలా పురుడు పోసుకున్నాయో తెలుసుకోవాలనే ఆసక్తి అతనికి కలిగేది. వాట్సాప్ యుగంలో యువతలో ఇలాంటి ఆలోచనలు అరుదుగా కనిపిస్తాయి.

తన పుట్టి పెరిగిన ప్రాంతం, ఆనాటి సమాజం గురించి తెలుసుకోవాలనే ఆసక్తి దేవరాజులో రోజురోజుకూ పెరుగుతోంది. తన మూలాలకు సంబంధించిన అంశాలను తెలుసుకోవాలనే తపనతో నిమ్మపల్లి గ్రామం చుట్టూ తన ఆలోచనలు పరుచుకున్నాయి. చరిత్ర వెంట పరుగులు తీస్తున్న దేవరాజు ఆలోచనలు 1970వ దశకంలో ఆగిపోయాయి. భూమి, భుక్తి, విముక్తి దిశగా సాగిన తెలంగాణ సాయుధ పోరాట త్యాగాల జాడలు నిమ్మపల్లి చుట్టూ అల్లుకున్న కాలం అది.

1948–1951 మధ్యకాలంలో జరిగిన పోరాటం నాటి నీరటి కుటుంబ పెద్దల్లో ఒకరైన పెద్దులు సాయుధ పోరాటాల వెల్లువను చూసినవారే. కుటుంబానికి ఐదు ఎకరాల వ్యవసాయ భూమి అప్పట్లో ఆధారం. పెద్దులు కొడుకు నట్టరాజానికి వారసత్వంగా వచ్చిన భూమిని గ్రామ పెత్తందారులు ఆక్రమించుకోవడంతో అతను రగిలిపోయేవాడు. తండ్రి చెప్పిన పోరాట అనుభవాల స్ఫూర్తితో, నట్టరాజం తాను ఎంచుకున్న మార్గం ద్వారానే భూమిని తిరిగి సంపాదించుకోవాలని తపించేవాడు.

పెత్తందారుల అహంకారపూరిత వైఖరి, ఆక్రమణలు ఆ ప్రాంతంలోని రైతాంగాన్ని తీవ్ర కలవరానికి గురిచేశాయి. 1972 ప్రాంతంలో ఈ పరిస్థితి రైతాంగాన్ని, ప్రజలను ఆలోచనలో పడేసింది. కోల్పోయిన చోటే ఆత్మగౌరవాన్ని తిరిగి సాధించుకునేందుకు ఆనాటి యువతరం సిద్ధమైంది. అలా సిద్ధమైన తరానికి చెందినవాడే నట్టరాజం, తెలంగాణ సాయుధ పోరాటం తర్వాతి తరానికి చెందినవాడు. రోజురోజుకూ గ్రామాల్లో పెరుగుతున్న దొరల పెత్తనంపై యువతలో అసంతృప్తి పెరిగింది.