તલોદ પોલીસે હરસોલ ગામની ચોરીનો ભેદ ઉકેલ્યો, બે આરોપીઓ ઝડપાયા

તલોદ પોલીસની એક મોટી કાર્યવાહીમાં, હરસોલ ગામની રોહિત સમાજવાડીમાં થયેલી ચોરીનો ભેદ ગણતરીના દિવસોમાં ઉકેલવામાં આવ્યો છે. પોલીસે આ ચોરીના ગુનામાં સંડોવાયેલા બે આરોપીઓને સફળતાપૂર્વક ઝડપી પાડ્યા છે.

ઝડપાયેલા આરોપીઓની ઓળખ સંગ્રામસિંહ જાલમસિંહ ઝાલા (રહે. જેથાજીના મુવાડા, તા. તલોદ) અને રવિન્દ્રસિંહ શૈલેષસિંહ ઝાલા (રહે. સુરપુર, તા. તલોદ) તરીકે થઈ છે. પોલીસે તેમની પાસેથી લોખંડના સળિયા, સેન્ટિંગ પ્લેટ અને પાઇપ સહિતનો મુદ્દામાલ જપ્ત કર્યો છે. આ ઉપરાંત, ચોરીમાં વપરાયેલી CNG રિક્ષા પણ પોલીસે કબજે કરી છે.

કુલ મળીને, પોલીસે રૂ. 2,12,830 ની કિંમતનો મુદ્દામાલ જપ્ત કર્યો છે. આ સફળ કામગીરી તલોદ પોલીસ ઇન્સ્પેક્ટર સી.જી. રાઠોડના માર્ગદર્શન હેઠળ PSI બી.એલ. રાયજાદા અને પોલીસ સ્ટાફ દ્વારા કરવામાં આવી હતી.