સુરતની ખાડી સફાઈમાં બેદરકારી: તંત્રએ એજન્સીને સોમવાર સુધીમાં ડેટા આપવા અલ્ટિમેટમ આપ્યું

ખાડી સફાઈના પ્રોજેક્ટમાં કન્સલ્ટન્ટ એજન્સીની કામગીરી સામે સુરત મહાનગરપાલિકાના ઉચ્ચ અધિકારીઓએ નારાજગી વ્યક્ત કરી છે. અગ્ર સચિવ થેન્નારાસન અને પાલિકા કમિશનર રાજકુમાર બેનીવાલે કન્સલ્ટન્ટ દ્વારા આપવામાં આવેલા બહાનાઓને ધ્યાનમાં લીધા વગર, સોમવાર સુધીમાં ખાડીના તળિયે જામેલા કાંપ અને કચરાનો ચોક્કસ ડેટા રજૂ કરવા માટે અલ્ટિમેટમ આપ્યું છે.

આશરે ૧૮૮ કિલોમીટર લાંબી ખાડીનો ડ્રોન અને ડીજીપીએસ સર્વે પૂર્ણ થયા બાદ, તેના આધારે હાઇડ્રોલોજી મોડેલ તૈયાર કરી ખાડીના નવા ડેન્જર લેવલનું પુનઃમૂલ્યાંકન અને ડિટેઇલ્ડ પ્રોજેક્ટ રિપોર્ટ ૧૫ દિવસમાં રજૂ કરવાનો હતો. જોકે, રજૂ કરાયેલા રિપોર્ટમાં પાયાની ટેકનિકલ વિગતોનો અભાવ જોવા મળ્યો હતો. કન્સલ્ટન્ટે સરકારી વિભાગો પાસેથી વિગતો ન મળતી હોવાનો બચાવ કર્યો હતો, પરંતુ તંત્રએ આ બહાનાને સ્વીકાર્યું ન હતું.

નિષ્ણાતોના મતે, ડ્રોન સર્વે માત્ર સપાટીની માહિતી આપી શકે છે. ખાડીના તળિયે જામી ગયેલા કાંપ અને કચરાની જાડાઈ માપવા માટે ‘બેથિમેટ્રિક સર્વે’ જરૂરી છે, જે હજી અધૂરો છે. આ સર્વે વિના ખાડીની વાસ્તવિક ઊંડાઈ અને કેટલો કાંપ કાઢવો પડશે તેનો વૈજ્ઞાનિક અંદાજ મેળવવો મુશ્કેલ છે. આ કારણે, ડેન્જર લેવલની ગણતરી અને ટેન્ડર પ્રક્રિયા પણ અટવાઈ ગઈ છે, કારણ કે ખોટા અંદાજને કારણે કોન્ટ્રાક્ટરને મોટું નુકસાન થઈ શકે છે અથવા પ્રોજેક્ટ વિવાદમાં ફસાઈ શકે છે. ખાડી કેટલી પહોળી થઈ છે તે ચકાસવા માટે શનિવારે ગાંધીનગરથી ઇરિગેશન ટીમ સુરત આવશે.